Eurodeputeti David McAllister, njekohesisht Zv. president i Grupit Parlamentar të PP,  i pyetur nëse do të bashkëpunojë me Partinë Demokratike tani që drejtohet nga Sali Berisha, i shpallur ‘non grata’ nga DASH, tha se vendimi do të bëhet publik javën e ardhshme, në mbledhjen e PP-së në Roterdam.

 Ai theksoi se ndodhet në Tiranë si kreu i delegacionit të Komisionit Parlamentar për Çështjet e Jashtme, po shtoi se si anëtar i CDU-së dhe zv.president i PPE do të përpiqet që të tejkalohen dallimet ose ndasitë.

“Ishte goxha përvojë ajo që patëm në 2017 kur patëm nderin të ndihmonim në tejkalimin e disa diferencave politike. I kam ndjekur zhvillimet në vend. Kam respekt për Shqipërinë dhe shqiptarët. Këtu po udhëtoj si kreu i delegacionit të Komisionit Parlamentar për Çështjet e Jashtme, jo si zv. president i Grupit Parlamentar të PP, prandaj nuk kam mundësi të komentoj për zhvillimet në PD, por të jeni të sigurt që  po i ndjekim zhvillimet nga afër”.

Të jeni të sigurt se në kapacitetin tim si anëtar i CDU po i ndjekim të gjitha zhvillimet në PD nga afër dhe do përpiqemi të japim mbështetjen tonë si PP që të tejkalohen dallimet ose ndasitë”.

Sali Berisha është rikthyer në krye të Partisë Demokratike, por nuk mori asnjë urim nga ndërkombëtarët.

Rruga e Elbasanit zgjodhi të flasë me heshtje duke lënë të kuptohet se porosia e Uashingtonit ka nisur të zbatohet: Me Berishën kryetar, Partia Demokratike do ketë raport të pamundur me Shtetet e Bashkuara te Amerikës.

Si asnjëherë më parë, mesazhi i urimit mungoi dhe nga partitë simotra në Gjermani. I vetmi mesazh që mbërriti në selinë blu nga CDU/CSU  ishte pak para zgjedhjeve, përmes  raportuesit  për Ballkanin, Gunther Krichbaum, i cili paralajmëroi  një pezullim të Partisë Demokratike nga partitë popullore europiane nëse drejtimin e merr Berisha.