Prokuroria e Tiranës ka njoftuar se merr të pandehur ish deputetin e Partisë Demokratike Ervin Salianjin për çështjen e njohur si “Xhafaj-Babale”. Ai është thirrur të premten më 8 mars për tu njohur me akuzat e Prokurorisë.

Në një video që dyshohet se është e montuar, dhe që është iniciuar edhe nga ish- deputeti Salijanji, duket sikur vëllai i ish- ministrit Xhafaj bisedon për afëra të trafikimit të drogës, me trafikantë.

Pak ditë më parë Salianji ishte ankuar për zgjatjen e afateve të hetimit. Ai e ka cilësuar ‘tërësisht në shkelje të ligjit zgjatjen e afateve’ të hetimit nga Prokuroria për çështjen “Babale-Xhafaj” për të cilën ai dhe gazetari Olldashi janë në hetim për akuzën “kallzim i rremë”.

Më herët deputeti ka sqaruar në prokurori se, për audio-përgjimin “Babale-Xhafaj”, nuk ishte ai ndërmjetësi i takimit Olldashi-Albert Veliu (Personi që akuzoi vëllain e Fatmir Xhafës për trafik droge). Ndërsa për videon e dytë me aktorin e këtij përgjimi, Fredi Alizotin, deputeti shpjegoi se ia kishte dhënë shtetasi Florenc Hoxha.

Avokati i Ervin Salianjit tha se: “Pretendimet tona kanë të bëjnë me ankimimin tonë për mos zgjatjen e hetimeve. Kërkojnë të zvarrisin procesin duke pyetur të njëjtin person siç është Fredi Alizoti. Gjykata do shprehet të hënën për ankimin. Dosja është transferuar nga njëra gjykatë tek tjetra”.

Veritas.com.al/