“Kjo nuk është një çështje e shqetësimeve të Rusisë. Është çështje e urisë së saj”.

Shqipëria e mbështet pa asnjë kusht Ukrainën, pas agresionit rus të natës së 24 shkurtit, kur bombardimet nga ana e Kremlinit filluan të godisnin Ukrainën, pas urdhrit të presidentit rus, Vladimir Putin.

Sipas të dërguarit të përhershëm të Shqipërisë në Organizatën e Kombeve të Bashkuara, Ferit Hoxha, ky agresion gjakftohtë nuk është gjë tjetër, veçse një veprim vetëshkatërrues i Moskës.

“I bëjmë thirrje Rusisë të ndalojë dhe të reflektojë menjëherë. Misioni i tyre si një vend i madh në botë, është ta ruajnë paqen dhe jo ta prishin atë”.

Me këto fjalë, Hoxha theksoi se është e papranueshme, që Rusia të sulmojë në të tillë mënyrë vendet fqinje dhe të kërkojë pushtimin e tyre.

I vetmi “faj” që Ukraina ka bërë, sipas tij, është fakti se ka zgjedhur të jetë një shtet sovran dhe demokratik.

“Diplomacia, është si shpresa”, theksoi Hoxha. “Ajo vdes e fundit. Por, që të funksionojë, duhet pranuar, jo injoruar”.

Një reagim ka ardhur edhe nga kryeministri i vendit, Edi Rama, i cili u është bashkuar thirrjeve të NATO-s, Bashkimit Evropian dhe aleatëve, për të dënuar sulmin ndaj Ukrainës.

“Mendimet tona janë me qytetarët e Ukrainës”, përmbledh me pak fjalë Rama në Twitter.

Ndërsa, Hoxha, u ka kërkuar zyrtarisht anëtarëve të tjerë në Këshillin e Sigurimit dhe në OKB, që t’u qëndrojnë pranë ukrainasve dhe t’i mbështesin ata në këtë agresion të radhës rus.