Ka qenë një nga njerëzit e LSI-së që ka ngjitur shkallët e karrierës falë mbështetjes nga partia por me sa duket pushteti është më i ëmbël se çdo moral tjetër.

Një tjetër kandidat në pritje i LSI për të marrë mandatin e deputetit ka dorëzuar pranë KQZ formularin e dekriminalizimit. Bëhet fjalë për Ralf Gjonin, i cili bëhet kështu ‘tradhtari’ i radhës që preferon të marrë mandatin parlamentar, pavarësisht vendimit të kësaj force për t’i djegur mandatet.

I pyetur nga Top Channel, kandidati i listës shumemërore të LSI-së për kryeqytetin, njëkohësisht ish-sekretar ndërkombëtar i LSI-së dhe ish-zëdhënës i Ministrisë së Punëve të Jashtme, sikurse edhe ish-këshilltar për politikën e Jashtme pranë kryetarit të Kuvendit, Gjoni është shprehur:

“Po! Konfirmoj se sot kam dorëzuar pranë KQZ-së formularin e vetëdeklarimit për garantimin e integritetit të kandidatit dhe, në varësi të vendimit të KQZ-së, kam vendosur pranimin e mandatit të deputetit në Kuvendin e Shqipërisë, sipas ligjit dhe në funksion të Kushtetutës”.

Gjoni ka vijuar më tej duke argumentuar pse ka marrë këtë vendim.

“Ky ka qenë ndoshta vendimi më i vështirë politik në jetën time dhe pas një konsultimi të gjerë e të gjatë me familjen time, miq të afërt e kolegë brenda e jashtë vendit, si dhe me votues e aktivistë të shumtë që më kanë mbështetur gjatë fushatës elektorale, kam vendosur të vazhdoj shërbimin tim ndaj agjendës euroatlantike të vendit, e të jem në krahun e drejtë të historisë”, tha Gjoni për Top Channel.

Ralf Gjoni shprehet më tej se emri dhe integriteti i tij “nuk mund t’i shërbejnë kurrë destabilizimit të vendit”.

“Ndaj sot, të gjithë duhet të marrin përgjegjësitë që kanë për të garantuar funksionimin normal të Parlamentit, si themel i shtetit shqiptar. Shqiptarët meritojnë qetësi, progres e shpresë për të ardhmen”, shprehet Gjoni.

Mësohet se Gjoni ka pasur kontakte me Uashingtonin, Berlinin e Brukselin gjatë këtyre ditëve dhe është inkurajuar të hyjë në Parlament.

Veritas.com.al/