Sekretari Amerikan i Shtetit, Marco Rubio, u largua nga Vatikani pas takimit me Papa Leonin, në një moment tensionesh mes presidentit amerikan Donald Trump dhe kreut të Kishës Katolike.

Vizita e Rubios në Selinë e Shenjtë zgjati rreth dy orë e gjysmë dhe u zhvillua nën masa të rrepta sigurie. Fillimisht ai u takua me Papën dhe më pas zhvilloi bisedime edhe me zyrtarë të lartë të Vatikanit, përfshirë kardinalin Pietro Parolin, i cili drejton diplomacinë e Selisë së Shenjtë.

As Vatikani dhe as Departamenti Amerikan i Shtetit nuk dhanë menjëherë detaje konkrete mbi përmbajtjen e takimeve, por mediat ndërkombëtare raportuan se bisedimet mund të kenë qenë të ndjeshme për shkak të përplasjes publike mes Trumpit dhe Papës Leonit, lidhur me luftën në Iran dhe politikën amerikane ndaj emigracionit.

Takimi mes Rubios dhe Papës ishte i pari mes një anëtari të kabinetit Trump dhe Papës pas afro një viti. Sipas raportimeve, takimi zgjati më shumë se sa ishte planifikuar, pasi Papa mbërriti me 40 minuta vonesë në një aktivitet tjetër të planifikuar me stafin e Vatikanit, ku më pas falënderoi të pranishmit për durimin.

Fotografitë e publikuara nga Vatikani treguan momentin kur Papa Leo dhe Rubio shtrënguan duart në Pallatin Apostolik para se të uleshin për bisedime në zyrën zyrtare të Papës. Papa Leo, i cili është Papa i parë amerikan në historinë e Kishës Katolike, ka kritikuar hapur luftën SHBA-Izrael ndaj Iranit dhe politikat e ashpra anti-emigracion të administratës Trump.

Këto qëndrime kanë shkaktuar reagime të forta nga presidenti Trump, i cili javët e fundit ka sulmuar publikisht Papën në disa deklarata.

Vetëm pak ditë më parë, Trump deklaroi se Papa po “rrezikonte shumë katolikë” duke kundërshtuar luftën dhe madje pretendoi se Papa mbështeste mundësinë që Irani të zotëronte armë bërthamore. Papa Leoni reagoi menjëherë ndaj këtyre deklaratave duke theksuar se misioni i Kishës është predikimi i paqes dhe jo mbështetja e luftës apo armëve bërthamore. Ai deklaroi para gazetarëve se Kisha Katolike ka qenë prej vitesh kundër armëve bërthamore dhe se qëndrimi i saj për paqen është i qartë dhe i pandryshueshëm.

“Detyra e Kishës është të predikojë Ungjillin dhe paqen”, deklaroi Papa, duke ritheksuar kundërshtimin e fortë të Vatikanit ndaj armëve bërthamore dhe konflikteve ushtarake. Deklaratat e Papës janë përshëndetur nga shumë liderë fetarë dhe organizata ndërkombëtare, ndërsa sulmet e Trumpit kanë sjellë reagime kritike edhe nga figura të ndryshme të krishtera në SHBA dhe Evropë.

Ndërkohë, para mbërritjes së Rubios në Vatikan, Papa Leoni ka zhvilluar një takim edhe me kryeministrin polak Donald Tusk. Pas takimit, Tusk deklaroi se kishte diskutuar me Papën mbi nevojën për forcimin e bashkëpunimit ndërkombëtar dhe shmangien e kaosit global përmes unitetit dhe vullnetit të mirë mes vendeve.

Papa Leoni, i cili këtë javë shënon një vit nga zgjedhja në krye të Kishës Katolike me mbi 1.4 miliardë besimtarë, është bërë gjithnjë e më aktiv në çështjet ndërkombëtare. Gjatë një turi në Afrikë muajin e kaluar, ai kritikoi ashpër drejtimin e politikës globale dhe deklaroi se bota po “shkatërrohej nga një grusht tiranësh”, megjithëse më vonë sqaroi se komentet nuk kishin në shënjestër drejtpërdrejt Trumpin.