Përgjimet e botuara nga “Bild”, që duket se janë të montuara diku në Tiranë, dhe që në fakt i kanë bërë ‘ gjëmën’  mikut të tyre gazetar freelance në Bild, kanë një sërë pasaktësish të cilat shërbejnë për të montuar një skenë irreale të personazheve të përfshirë në fushatën e Dibrës.

Përveç faktit që u bë kujdes që përgjimet të zhurmonin thirrjen në Prokurori të Lulzim Bashës, ajo çka e bën edhe më flagrante përdorimin e gazetës gjermane, është pikërisht raporti mes materialit audio të publikuar në gjuhën shqipe, dhe tekstit sqarues të shkruar në gjermanisht dhe anglisht, mbi këtë material.

Çdokush është i lutur që të kontrollojë audion në gjuhën shqipe me tekstin shoqërues të shkruar mbi këtë material.

Një tekst që sipas të dhënave, rezulton të jetë shkruar në shqip dhe anglisht në Tiranë, e më pas dërguar gazetes, e cila thjesht e ka përkthyer në gjermanisht.

Le t’i shikojmë me radhë.

Arben Keshi, eksponenti që është i rregjistruar në audio teksa flet me kryeministrin Edi Rama, nuk rezulton të ketë qenë në atë kohë punonjës i Policisë së Shtetit siç thuhet në raportimin e Bild.

Ai ka mbajtur detyrën e koordinatorit elektoral, përgjegjës për organizimin zgjedhor të Partisë Socialiste në Komunën e Maqellares, më parë ka qenë dhe kandidat për kryetar.

 

Është mëse e natyrshme që Partia Socialiste cakton ‘objektivat’ e saj elektorale për rezultatet ( që qënkan kapur si krim) në çdo njësi administrative.

Përmbajtja e telefonatës së kryeministrit me Arben Keshin në këtë rast është tërësisht bisedë normale dhe nuk ka asnjë element që ta bëjë të dyshimtë, e aq më pak anti-ligjore.

Sajesat e shkruara nga Tirana dhe përkthyera në gjermanisht mbi materialin audio, shkojnë dhe më tej.

Në bisedën e Arben Keshit me ish-ministrin Gjiknuri, ky i fundit i përgjigjet shqetësimit të Keshit për presionin që po ushtronin deputetët dhe individë të dyshimtë, militantë të Partisë Demokratike në zonën ku Keshi ishte përgjegjës elektoral.

Gjiknuri i bën me dije se aty po vijnë dhe deputetët e Partisë Socialiste, ashtu sikurse dhe mbështetës të kësaj force politike, të cilët do të mbrojnë Keshin nga sulmet e njerëzve të dërguar nga Partia Demokratike.

Çuditërisht, gazetës “Bild” nuk ja kanë përkthyer audiot shqip kur thuhet qartësisht se si ish-ministri i Brendshëm Flamur Noka me 50 persona kanë ushtruar terror dhe kanë dhunuar përfaqësuesit e Partisë Socialiste.

Një tjetër gafë e qëllimshme rezulton tek biseda mes ish-ministrit Gjiknuri me të ashtuquajturin biznesmen, Bekim Krashi.

Ndryshe nga sa i është shkruar gazetës nga Tirana, Bekim Krashi nuk është biznesmen, por në fakt rezulton të ketë qenë një ndër funksionarët vendor dhe koordinator elektoral i Partisë Socialiste për Komunën Arras.

Në bisedën audio, të cilën mund ta dëgjojë kushdo, në asnjë moment kur flitet për transport, nuk përmendet fjala “lekë”.

Ajo është e shkruar vetëm në tekst në shqip e anglisht dhe përkthyer nga “Bild” në gjermanisht.

Gjithashtu, në asnjë moment në audio nuk përmendet shprehja “kjo është punë shteti” nga ish-ministri Gjiknuri.

Mjafton të dëgjohet audio në shqip dhe kushdo e kupton se ai shprehet “ju edhe jeni mbështetës” e më tej “kërkoni mbështetje”.

Në kontekstin në të cilin zhvillohen zgjedhjet, është qartësisht e kuptueshme se të gjitha kampet janë mobilizuar maksimalisht për të sjellë mbështetësit e tyre në kutitë e votimit.

Duke qenë se Bashkia e Peshkopisë ka njësitë administrative në zona të thella malore, forcat politike angazhohen për të mundësuar transportin e mbështetësve të tyre drejt qëndrave të votimit në ditën e zgjedhjeve.

Ky është në fakt dhe thelbi i bisedës së regjistruar mes koordinatorit elektoral të PS-së në Arras, Bekim Krashi dhe ish-ministrit Gjiknuri.

Edhe në këtë bisedë, qartësisht nuk ka asgjë të çuditshme dhe as anti-ligjore.

Çudia në fakt qëndron tek materiali i dërguar gazetës nga Tirana.

Gazetari i “Bild” nuk e konsideron problem faktin që po sipas audios, del qartë se kryebashkiaku demokrat Xhelal Mziu po organizon 300 persona nga Kamza për t’i dërguar ditën e zgjedhjeve në Lurë.

 

Ndërsa e konsideron skandal që Partia Socialiste merr masat që të garantojë transportin e mbështetësve të saj nga fshatrat deri tek qendrat e votimit.

Madje shkon më tej duke e marrë për të mirëqenë përkthimin anglisht që i është shkruar nga Partia Demokratike, duke shtuar fjalë të pathëna e duke shpikur biznesmenë të paqenë.

GAzetarin  e ‘Bild’  e kanë marë në qafë ata që ‘ e duan më shumë’  ose njerëz që kanë desinformuar përmes gazetarit gjerman.

Veritas.com.al/