Një kontroll i figurës së kandidatëve, zakonisht kalon në Komision për shqyrtim, por duke qenë se kandidatura nuk ka, atëherë procesi vijon në mënyrë automatike për votim në Kuvend.

Kreu i Grupit Parlamentar të Partisë Demokratike, Enkelejd Alibeaj, përmendi faktin se opozita kërkon gjithëpërfshirje në proces. Pra, ai ndoqi një retorikë ku kërkohet miratimi i të dy palëve për të zgjedhur Presidentin e ri.

Ndër të tjera, Alibeaj e akuzoi drejtpërdrejt mazhorancën, si shkaktare të krizës dhe bllokuese të procesit.

Një replikë gjithsesi ka ardhur nga deputeti Oerd Bylykbashi, i cili është pjesë e grupimit të fraksionit demokrat të Sali Berishës.

Sipas Bylykbashit, ky proces po pengohet nga të dy palët dhe një ndasi mes opozitës u shfaq.

Kreu i Grupit Parlamentar Aleanca për Ndryshim, Fatmir Mediu, nga ana tjetër, theksoi rëndësinë për të gjetur një zgjidhje të brendshme mes opozitës dhe për të mos e djegur mundësinë e zgjedhjes së një presidenti konsensual. Në të kundërt, vendi shkon në krizë edhe më të thellë.

Në fund të mbledhjes së shkurtër të Komisionit të Ligjeve, vetëm me votat e shumicës parlamentare, raporti kaloi për votim në Kuvend.

Ndërsa, opozita, vendosi të abstenojë miratimin e raportit në komision.

Thënë kjo, pritet që seanca plenare e 16 majit, të mbahet rregullisht në orën 17:00, siç ishte e parashikuar.