Mbrëmë, gjithë natën, reshjet kanë vërshuar në të gjithë vendin, me një intensitet shumë të lartë.

Nga të gjitha anët vijnë informacione se ka përmbytje, bllokime nga ujërat e shumta, vështirësi në qarkullim, etj.

Drejtoria e Emergjencave Civile publikoi të dhënat e fundit në lidhje me situatën e krijuar nga reshjet e shiut.

Qarku Tiranë

Në të gjithë qarkun e Tiranës ka patur reshje intensive shiu të shoqëruara me shtrëngata. Shirat kanë shkaktuar probleme në qarkullimin e automjeteve dhe lëvizjen normale të qytetarëve në qytetin e Tiranës. Zonat më problematike që kanë prezencë të rritur të ujit janë tek Muzeu Kombëtar, “Misto Mame”, Qafë Kashar dhe në qytetin e Kamzës.

Qarku Vlorë

Në qytetin e Vlorës ka patur reshje intensive pas mesnatës dhe deri në orët e para të mëngjesit. Reshjet kanë krijuar probleme në nënstacionin elektrik të Skelës dhe në zonën prapa Universitetit Ismail Qemali.

Në të gjithë rrugët e qytetit ka patur prezencë të ujit ku situata më problematike ka qenë në rrugën ‘’Transballkanike’’.

Qarku Shkodër

Për shkak të reshjeve intensive që kanë rënë gjatë natës dhe sot në mëngjes në qarkun e Shkodrës ka disa probleme në infrastrukturë. Më problematike ka qenë situata te ura Tamarë-Koplik (në ndërtim e sipër) dhe Ura e Buklit.Të dy këto ura janë dëmtuar plotësisht. Një banesë në Vukël, Njësia Administrative Tamarrë, është përmbytur dhe familja është evakuuar për shkak të rrezikut nga përmbytja.

Qarku Lezhë

Në shumë rrugë të qytetit të Lezhës për shkak të reshjeve të dendura të shirave kanë patur prezencë të ujit duke krijuar probleme në katet e para të pallateve, sidomos në disa banesa dhe biznese.

Hidrovoret në të gjithë qarkun punojnë me kapacitet të plotë dhe nuk kanë ndërprerje të energjisë elektrike. Në tokat bujqësore të rrethit të Lezhës dhe Kurbinit nuk ka probleme me përmbytjet.