Spanja është kampionia e re e botës në futboll, pasi mposhti Argjentinën me rezultatin 1-0 pas kohës shtesë në finalen e Kupës së Botës 2026, të zhvilluar në stadiumin “New York New Jersey”.

Golin e fitores e shënoi Ferran Torres në minutën e 106-të, duke i dhënë “La Roja”-s trofeun e dytë në historinë e saj pas triumfit të vitit 2010.

Finalja u karakterizua nga dominimi i Spanjës, e cila krijoi më shumë raste dhe kontrolloi pjesën më të madhe të lojës, ndërsa Argjentina pati vështirësi në fazën sulmuese. Pavarësisht rezistencës së portierit Emiliano Martínez dhe mbrojtjes argjentinase, skuadra e drejtuar nga Luis de la Fuente gjeti golin vendimtar në kohën shtesë falë Ferran Torres, i aktivizuar nga stoli.

Për Argjentinën, kjo ishte një finale e hidhur dhe mund të shënojë paraqitjen e fundit të Lionel Messit në një Kupë Bote. Pas vërshëllimës përfundimtare pati edhe tensione mes lojtarëve të të dyja skuadrave, ndërsa festa shpërtheu në kampin spanjoll për suksesin historik.