Gjashtë muaj pasi u prangos me kërkesë të SPAK-ut, ish-deputeti i Partisë Socialiste, Alqi Bllako, ka lënë qelitë e paraburgimit.
Këtë të enjte, Gjykata e Posaçme pranoi kërkesën e ish-deputetit të arrestuar për aferën e inceneratorit të Fierit, për zbutje të masës së sigurisë, duke zëvendësuar masën “arrest në burg” me atë të “arrestit në shtëpi”.
Para gjykatës, avokati i Bllakos, Sokol Hazizaj, argumentoi kërkesën për lehtësim të masës me faktin se SPAK-u ka ezauruar të gjitha veprimet hetimore, se ish-deputeti nuk ka rrezikshmëri shoqërore dhe se nuk ka mundësi të dëmtojë provat, apo t’i shmanget hetimit.
Si argument janë paraqitur edhe rrethanat familjare të ish-Sekretarit të Përgjithshëm, nevoja e tij si kryefamiljar në përkujdesjen e tre fëmijëve të mitur.
SPAK kërkoi arrestimin e Alqi Bllakos në fund të muajit mars, pas dyshimeve ndaj tij për “korrupsion” dhe “shpërdorim të detyrës” gjatë procedurës tenderurese për inceneratorin e Fierit.
Bllako dorëzoi mandatin e deputetit, pak orë pasi SPAK i kërkoi Kuvendit autorizim për ta arrestuar. Sipas SPAK, në bashkëpunim me ish-ministrin Lefter Koka, Bllako ka falsifikuar dokumentin në lidhje me llojin e sipërfaqes së tokës ku u ndërtua inceneratori, duke mashtruar Këshillin e Ministrave, si edhe ka përfituar rryshfet për favorizim të paligjshëm të kompanisë koncensionare.
74 280 
