Shkruar nga: Eksklusive.al/

Monika Kryemadhi, pa iu skuqur fytyra, deklaroi përballë gazetares Sonila Meço, se ajo nuk është e varfër dhe se pasurinë e ka përfituar nga familja e saj, kryesisht nga babai brigadier, i cili i paska lënë prona me vlerë miliarda lekë, falë profesionit të tij.

Komike në fakt janë përpëlitjet e ditëve të fundit të çiftit presidencial Meta-Kryemadhi, të cilët po sforcohen keq të deklarojnë para mediave, atë që shqiptarët e dinë të gjithë, se ata jo vetëm që nuk janë të varfër, por janë aq të kamur, sa deri dje u shisnin mend qytetarëve me luksin e tyre të shfrenuar.

Të gjithë i panë pamjet e Vilës së “tangërllikut” të Sheikut Ilir Meta, nga Çepani i Skraparit, me vlerë miliona euro, të paimagjinueshme për çdo qytetarë shqiptar, e mobiluar me orenditë më të shtrenjta, 11 banjot dhe një për macen dhe palmat milionshe për zbukurim.

E nuk do jetë e largët dita, kur gazetarja Sonila Meço, dëshmitarja e videos së luksit të vënë me para të dyshuara nga korrupsioni pasiv dhe aktiv, do merret në pyetje për të gjitha ato që ka parë, bashkë me grupin e xhirimit dhe të shpjegoi se kush ishte arsyeja që e detyroi televizionin, që ta “zhdukte” videon nga “faqja e dheut”!

Por pasuria e Çiftit Presidencial nuk mbaron këtu! Do pyeten për çdo qindarkë, sidomos për shtëpinë 3 katëshe në ish-Bllok, e shitur rishtazi një biznesmeni të njohur të hidrokarbureve (mik i ngushtë i familjes), me vlerë 10 herë më të lartë se sa vlera reale, për të mbuluar gropën e madhe të milionave të tyre të pajustifikuara.

Sigurisht, në listën e gjatë të pasurisë, nuk mund të harrohet vila e Kodrës së Diellit dhe… ajo në Lalëz, makinat, pushimet, shkollimet e fëmijëve… dhe dhuratat milionshe, si përshembull… gjerdani mijëra euro, që Monika i kërkoi për datëlindje anëtarëve të partisë së saj!

Por, Çifti Presidencial do të merret në pyetje dhe për datëlindjen vanitoze të Sheikut Ilir Meta në gjirin e Lalëzit, ku ngriti për herë të parë “çadrën” e tij, si preludi i të gjitha çadrave të tjera të ngritura kundër drejtësisë, për të “fshehur” milionat e asaj çadre, ku morën pjesë pushta pushtetarë e zagarë, që uronin duke pirë e u dendur me “g.jakun dhe djersën” e shqiptarëve.

E mbani mend apo jo datëlindjen e tij të 45-të, me 600 të ftuar, tek Gjiri i Lalëzit, ku qindra vetë provuan ushqimin më të shtrenjtë të shtruar ndonjëherë dhe verën më të shtrenjtë të parë ndonjëherë në bankete… ndërsa shqiptarët e ndiqnin nga ekrani duke lëpirë buzët. Vetëm në pjesën e jashtme të çadrës private, festa thuhet se kushtoi 200 mijë euro, të paguar sigurisht nga shqiptarët zemërgjerë e kurrizkthyer nga puna e ndershme!

Por a e dini pse janë në hall Çifti Presidencial?! Sepse ata, ndoshta mund ta justifikojnë vilën e pushimeve në Lalëz, siç pretendon Monika në emision, por kurrsesi nuk mund të justifikojnë asnjë qindarkë tjetër nga pasuria e tyre, se është blerë nga pallati që i la babai trashëgimi Monikës, të cilin nga një tokë buzë Lanës e kthyen në “karabina” që do t’i zej brenda, sapo të ngrihet SPAKU dhe BKH, sepse paratë e këtij pallati u shpenzuan për vilën e famshme…!

Një “biznesmene” kaq e zonja si Monika, s’mund t’ia mbushi dot mendjen askujt e jo më shqiptarëve, se një banesë të pallatit të saj e shiti për të zbukuruar vilën me palma.

Një “biznesmene” kaq e zonja sa Monika, nuk mund të gënjejë askënd, se një shtëpi tjetër e shiti për të kompletuar vilën e luksit me mobiljet “Scavolini”. Nuk mund të thotë as që i ka dhuratë, se çdo dhuratë në vlerën mbi 10 mijë lekë quhet vepër penale e përfituar me favore, kur mban post politik apo zyrtarë.

Një konflikt i pastër interesi, që nuk ka ligj që e mbron, sepse kurrsesi nuk lejohet që një politikan të hapë agjensi imobiliare, as në vendin e çudirave…Shqipëri, ku blen me 1 dollarë dhe shet me 1000 mijë dollarë.

Një “biznesmene” kaq e zonja sa Monika, nuk mund të mashtrojë askënd, se ka shitur një banesë të pallatit të trashëguar për të ngritur 11 halet e vilës së saj, njëra vetëm për Sashën… macen, sepse dhe halet kanë koston e tyre dhe 11 janë goxha!

Një “biznesmene” e zonja si Monika, nuk bënë dot për budalla asnjë, që atë e njeh shumë mirë, ku deklaron se ka shitur të gjitha banesat që i la i ati trashëgimi, brigadieri më “pasunar” i fermës “Gjergj Dimitrov”, për t’i bërë 45 vjetorin shpirtit të saj binjak… në festën e k.rimit!

Natyrisht që Monika është “shenjtore”, këtë e kemi vënë re të gjithë, kur na predikon Zotin, se ka qenë shumë i dashur dhe bujar me të, duke i dhënë gjithë të mirat e kësaj bote… por na kujton pa dashje, se si i ka grabitur 16 mijë metra katrorë tokë ish fermës “Gjergj Dimitrov”.

Një biznesmene kaq e zonja sa Monika, nuk mund t’i hedh hi syve të shqiptarëve, e tu thotë se botoksi, unazat në stomak, makinat, pushimet, veshmbathjet, shkolla e fëmijëve paguhen nga pallati i lënë trashëgimi nga baba… sepse nuk kishin ndërtuar qiellgërvishtëse dreqi e mori, por vetëm një pallat, si kushdo që ka pas një tokë në Tiranë, e cila i ka krijuar kushtet të bëj një jetë të mirë e mos të vuajë për “bukën e gojës”, por jo të blej vila, apartamente dhe makina me vlera miliona euro.

Por prapëseprapë, ata mundohen e sforcohen, në çdo studio televizive që dalin, përpëliten e zvarriten për t’i mbushur mendjen vetes se nuk do u preket asgjë nga pasuria e “trashëguar” gjithë këto vite, sepse shqiptarët e kanë mendjen “top” të mbushur, se do vijë një ditë që do bëhet krejtësisht e kundërta…nëse bëhet drejtësi

Nuk ka njeri që se ka kuptuar, se “qetësia dhe dashuria” ka marrë fund në “sarajet e trashëguara me djersën e ballit” dhe ndaj Çifti Presidencial sillet e përdridhet dhe shkon në punë në 5 të mëngjesit… pa vënë gjumë në sy.

Dikur Monika nga studio televizive deklaronte se: “Unë kam qenë fëmijë i shtresës së mesme. Gjithë jetën jam parë si një njeri normal, i padukshëm”, ndërsa sot deklaron se nuk e ka kompleks të thotë që jam e varfër.

“Nuk jam e varfër. Pasurinë e kam për hir të familjes sime dhe të babait tim. Ai ka qenë brigadier, por përjashtohej nga regjimi (e dënuan punëtor), sepse ishte kokëderr si puna ime”, tek habit dynjanë me fenomenin, se për këtë “dënim m.akabër” qenka shpërblyer me miliona.

Do u binte të fiktë në vend dhe do ishin ngritur nga varri drejt e në revolucion, gjithë të persekutuarit dhe të burgosurit politik, të indinjuar me veten e tyre, që përse nuk deklaruan për vuajtjet e tyre, b.urgosjet dhe internimet, sapo të dëgjonin fjalët e shenjtores: “Ka qenë brigadier, e dënuan punëtor.”

Ky është humor i zi, sepse edhe nëse kjo tokë është përfituar me ligjin 7501, tokë në përdorim, çifti Meta-Kryemadhi, kurrsesi nuk mund të bënte pallat, sepse është shkelje e rëndë e ligjit dhe abuzim me detyrën, sidomos nga Ilir Meta që në atë kohë mbante postin e kryeministrit. As i marri më i madh nuk mund ta besoj këtë histori si lugët e Nastradinit!

Për kujtesë, ja çfarë deklaroi Monika mbrëmë në studio, jo si një dëshmi apo pendim, por si pohim i k.rimit për çdo njeri që ka sy e vesh dhe që jeton në Shqipëri:

“Ai (babai) përfitoi një pronë në atë kohë. Zuri një buzë tokë krah lumit të Lanës dhe ndërtoi vilë. Atë vilë ne sot e kemi rrëzuar dhe e kemi bërë pallat. Ato janë 16 mijë metra katëror.

Kur kemi marrë vilën në Lalëz, e kemi marr me 450 euro metra katror. E kemi shkëmbyer me disa ambiente në pallat, me 450 metra ambiente te pallati.”, deklaroi Kryenmadhi në studion e dëshmitares së saj të vilës multimilionëshe në Gjirin e Lalëzit, gazetares Sonila Meço./Ekskluzive.al