
Ish-ministrja e Jashtme e Gjermanisë, Annalena Baerbock është zgjedhur presidente e Asamblesë së Përgjithshme të Kombeve të Bashkuara me një shumicë dërrmuese votash, të hënën në Nju Jork.
Përmes një votimi të fshehtë, të mbajtur në këtë institucion – më të madhin të Kombeve të Bashkuara – Baerbock, 44-vjeçare, ka siguruar 167 vota, 14 anëtarë kanë abstenuar, ndërsa shtatë të tjerë kanë votuar për kandidaten tjetër.
“Dera ime do të jetë gjithmonë e hapur për secilin”, ka thënë ajo.
Duke iu referuar krizave të shumta në botë, ajo ka thënë se “po jetojmë në kohë sfiduese, dhe jemi duke ecur në një litar të tendosur të pasigurisë”.
Baerbock pritet të inaugurohet më 9 shtator, pak para nisjes së seancës vjetore të Asamblesë së Përgjithshme të Kombeve të Bashkuara.
Guterres ka shprehur mbështetje të plotë për Baerbockun, duke përmendur përvojën e saj si ministre e Jashtme e Gjermanisë.