Drejtori i Drejtorisë Vendore të Policisë Lezhë, Vehbi Bushati në një konferencë për shtyp bëri me dije se është zbardhur ngjarja e ndodhur në vitin 2016, në Mirditë, ku mbeti i vrarë shtetasi Saimir Jaku dhe u plagos Gjergj Prenga.
 Ai njoftoi se në kuadër të operacionit të kryer është kapur dhe ndaluar shtetasi D. K., 40 vjeç, lindur në Kurbin dhe banues në Krujë, për veprat penale “Vrasja në rrethana të tjera cilësuese”, kryer në bashkëpunim dhe “Prodhimi dhe mbajtja pa leje e armëve luftarake e municionit”.

“Ky shtetas, në bashkëpunim me shtetas të tjerë, dyshohet se e ka kryer krimin e vrasjes së shtetasit Saimir Jaku, kundrejt pagesës. Porositësit e vrasjes dyshohet të jenë një grup i strukturuar kriminal që vepron në qarkun Lezhë, tashmë të identifikuar dhe nën hetim nga ana e Policisë”.

Sipas autoriteteve, janë gjetur dhe sekuestruar në cilësinë e provës materiale 21 aparate celulare dhe gjashtë mbajtëse të kartave SIM.

Nga ana tjetër, Bushati tha se në bashkëpunim me Prokurorinë pranë Gjykatës së Rrethit Gjyqësor Kurbin, po punojnë intensivisht për zbulimin e dokumentimin ligjor të ngjarjes së rëndë të ndodhur më datë 22 korrik 2022, në Milot.

Kush ishte Saimir Jaku?

Jaku mbante postin e Drejtorit të Tensionit të Lartë për Veriun e vendit ndërsa nga 1 shtatori 2016 kishte kaluar në pozicionin e shefit të Sektorit të Asistencës Teknike Skada plus GIS në Drejtorinë Qëndrore të Tensionit të Lartë në Tiranë.

Ai ka qenë anëtar i këshillit të qarkut të Lezhës nën siglën e Partisë Socialiste. Në vitin 2015 kandidoi dhe për kreun e këshillit të qarkut të Lezhës, por nuk siguroi votat e duhura.

Etiketa:

  • JAKU
  • Lezhe
  • Mirdite