Britania e Madhe po tregohet shteti evropian më i ashpër me Rusinë, duke parë sanksionet që po vendos, ku e përfshirë tashmë është e gjithë konjuktura ruse, me emra shumë të rëndësishëm në listë.
 Pas Vladimir Putinit dhe Sergey Lavrovit, radha për t’u sanksionuar i ka ardhur edhe 370 emrave të tjerë, ndër të cilës ish-presidentë dhe ministra të lartë.

Më i lakuari në listë, është një prej besnikëve të Putinit, Dmitry Medvedev, i cili në vitin 2008 deri në vitin 2012, ka mbajtur postin e Presidentit të Rusisë. Mirëpo, si një besnik i Putinit (në atë kohë kryeministër i vendit), se kush i jepte urdhrat dhe direktivat ishte e qartë. Më pas, për tetë vjet, Medvedev ka mbajtur pozitën e kryeministrit. Prej vitit 2020, është drejtues i Këshillit të Sigurisë në Rusi.

 

Zëdhënësi për shtyp i Putinit, Dmitry Peskov, është po ashtu ndër emrat e sanksionuar.

 

E njëjta gjë vlen edhe për ministrin e Mbrojtjes, Serhei Shoigu. Ai është edhe drejtuesi më i lartë ushtarak që Putin ka.

Maria Zakharova, zëdhënësja për shtyp e Ministrisë së Jashtme, nuk i ka shpëtuar sanksioneve britanike.

Në listën e zezë gjithsesi, janë futur edhe aktorë mediatike dhe bankarë.

Margarita Simonyan, kryeredaktorja e telvizionit Russia Today, është ndër emrat.

Dy bashkëthemelues të Alfa Bank, Pyotr Aven dhe Mikhail Fridman, janë në listë. Ky i fundit madje, është një biznesmen i bazuar në Londër, i cili pretendohet se ka lidhje me Putinin.

Sipas Sekretares së Jashtme britanike, Liz Truss, Britania po lëviz sa më shpejt të mundet me sanksionet, për të ngushtuar rrethin e të pëlqyerve të Putinit.

Anglezët janë kthyer në shtetin më veprues, sa i përket ndëshkimeve ndaj konjukturës ruse.

Etiketa:

  • britani
  • rusi