Këshilli i Emërimeve në Drejtësi, KED, ka reaguar këtë të hënë pas publikimit të një lajmi në Top Channel, lidhur me emërimin e anëtarit të Gjykatës së Lartë Asim Vokshi ”, që sipas institucionit “ka tejkaluar kufijtë e ushtrimit të përgjegjshëm të lirisë së medias”, duke bërë “akuza të pabazuara dhe pretendime të pavërteta”.

Në deklaratën zyrtare, KED thekson se Kushtetuta dhe ligji garantojnë lirinë e medias dhe të drejtën e informimit, por njëkohësisht kërkojnë që këto të drejta të ushtrohen “me përgjegjësi, pa abuzim dhe pa cenuar të drejtat e të tjerëve apo rendin publik”.

KED thekson se publikimi në fjalë “bazohet mbi të dhëna të rreme, të marra nga burime të dyshimta, në kufijtë e shkeljeve penale”, duke përbërë “një devijim serioz nga standardet ligjore dhe etike të informimit publik”.

KED sqaron disa çështje kryesore:

1. Asnjë informacion nuk është fshehur.
   Çdo vendimmarrje e Këshillit është zhvilluar në përputhje të plotë me ligjin dhe është publikuar në mënyrë transparente në faqen zyrtare të KED, por kjo sipas institucionit “nuk është pasqyruar në raportimin mediatik”.
2. Administrimi i informacionit të klasifikuar.
   Të dhënat që lidhen me sigurinë kombëtare trajtohen në mënyrë të posaçme dhe nuk mund të bëhen publike. KED thekson se ka verifikuar se informacionet e përmendura ishin “të pabazuara” dhe “nuk kishin ndikim ligjor apo faktik në vlerësimin e kandidatit”.
3. Cenim i reputacionit institucional dhe figurës së magjistratit.
   Publikimi i bërë nga media përbën, sipas KED, “një akt të papërgjegjshëm që dëmton integritetin e magjistratëve dhe besimin e publikut te institucionet kushtetuese”.
4. Kërkesë për verifikim të burimeve të informacionit.
   Këshilli i kërkon organeve kompetente të hetojnë mënyrën se si është siguruar dhe shpërndarë informacioni i pavërtetë, duke kërkuar vlerësimin e përgjegjësive ligjore përkatëse.
5. Përkushtim ndaj ligjit dhe transparencës.
   KED garanton se proceset e tij do të vijojnë të zhvillohen me “paanësi, profesionalizëm dhe respekt të plotë për ligjin”, pa u ndikuar nga “presione apo ndërhyrje të paligjshme”.

Ky reagim i KED vjen pas lajmit te publikuar ne Top Channel:

Dyshimeve në përzgjedhjen e anëtarit të Gjykatës Kushtetuese nga Gjykata e Lartë i janë shtuar të tjera fakte komprometuese.

Kryetari i KED, gjithashtu edhe i Gjykatës së Lartë, Sokol Sadushi ia fshehu trupës prej 15 gjyqtarëve të Gjykatës së Lartë gjatë procesit të votimit një informacion të rëndësishëm për kandidatin Asim Vokshi.

Bëhet fjalë për informacionin e institucioneve të sigurisë kombëtare se gjyqtari Asim Vokshi ka qenë informator ose agjent i shërbimeve të inteligjencës. Por shkelja nis nga hallka tjetër e rëndësishme siç është Këshilli i Emërimeve në Drejtësi, që për këtë vit drejtohet nga Sokol Sadushi dhe që nuk funksionoi sipas ligjit.

I krijuar si një organ kolegjial me 9 anëtarë që duhet të verifikojë kushtet e kandidatëve që konkurrojnë për në kushtetuese, KED e drejtuar nga Sokol Sadushi dyshohet se nuk e kreu detyrën për verifikimin e gjyqtarit Asim Vokshi, emri I të cilit më pas i kaloi mbledhjes së përgjithshme të gjyqtarëve.

Ky vendim i datës 17 qershor 2025 u dha në një kohë kur institucionet i kishin dorëzuar KED të dhëna kompromentuese që tregonin se kandidati Vokshi nuk duhet të kualifikohej më tej mbasi ekzistonte një kriter ndalues parashikuar në pikën 89/c të vendimit numër 4 viti 2019. Konkretisht të dhënat e siguruara nga TCH tregojnë se KED ju dorëzuan informacione nga institucionet e sigurisë ku përmendej se kandidati ishte bashkëpunëtor, informator ose agjent i shërbimeve të inteligjencës.

Por me gjithë informacionin që duhet të ishte lexuar më pas nga KED si kriter ndalues, të dhënat nuk u vlerësuan, nuk u panë dhe u anashkaluan gjatë vlerësimit dhe gjyqtari Asim Vokshi u listua në datën 17 qershor 2025 për të vijuar garën.

Dorëzimi i kësaj të dhëne thuhet se ndodhi gjatë verifikimit të integriteti që përfshin disa institucione mes tyre prokurorinë e përgjithshme, DSIK dhe autoriteti për dokumentat e ish sigurimit të shtetit të cilët ndoqën protokollin dhe dorëzuan të dhënat e tyre, por nëntë anëtarët e KED nuk panë dhe nuk lexuan duke e renditur të parin në listë Asim Vokshin.

Gjyqtari Asim Vokshi u zgjedh në shtator anëtar i Gjykatës Kushtetuese, duke plotësuar vakancën e gjyqtares Holta Zaçaj. Vendimi për emërimin e Asim Vokshit u mor në mbledhjen e anëtarëve të Gjykatës së Lartë. Vokshi u shpall automatikisht fitues pasi asnjëri nga tre kandidatët nuk mori 3/5 e votave. Vendimi u mor bazuar në pikët nga KED. Vokshi u rendit i pari me 89.5 pikë dhe u zgjodh anëtari që do të zëvendësojë Zaçajn. Ai do të ketë një mandat 9-vjeçar si anëtar i Gjykatës Kushtetuese.