Diplomatët më të lartë të Bashkimi Evropian do të zhvillojnë të hënën një takim në Bruksel me përfaqësues të Bordit të Paqes, në mes të debatit dhe polemikave rreth mbështetjes ndaj përpjekjeve të presidentit amerikan Donald Trump për sigurimin dhe rindërtimin e Rripit të Gazës.

Drejtori i Bordit të Paqes, Nikolay Mladenov, ish-politikan bullgar dhe diplomat i OKB-së i zgjedhur nga Trump për të drejtuar këtë strukturë, do të takohet me shefen e politikës së jashtme të BE-së, Kaja Kallas, si dhe me ministrat e Jashtëm të 27 vendeve anëtare. Në agjendë pritet të jetë edhe lufta në Ukrainë dhe sanksione të reja ndaj Rusisë.

“Ne duam të jemi pjesë e procesit të paqes në Gaza dhe të kontribuojmë me atë që kemi,” deklaroi Kallas para takimit.

BE-ja, e cila ka lidhje të thella me Izraelin dhe palestinezët, luan aktualisht një rol kyç mbikëqyrës në pikën kufitare të Rafahut mes Gazës dhe Egjiptit, si dhe është donatori më i madh i Autoritetit Palestinez.

Megjithatë, çështja nëse duhet bashkëpunuar me bordin e udhëhequr nga Trump ka përçarë kryeqytetet evropiane, nga Nikozia deri në Kopenhagë. BE-ja mbështet mandatin e Kombeve të Bashkuara në Gaza dhe po ndjek nga afër planin me 20 pika të Trump për armëpushim, që synon t’i japë fund sundimit të Hamasit dhe të rindërtojë territorin pas luftës shkatërruese.

Hungaria dhe Bullgaria janë anëtare të plota të bordit, ndërsa Turqia, Kosova dhe Shqipëria – vende kandidate për në BE – gjithashtu marrin pjesë. Dymbëdhjetë shtete të tjera të BE-së dërguan vëzhgues në takimin inaugurues në Uashington, mes tyre Austria, Gjermania, Italia dhe Polonia.

Nga ana tjetër, presidenti francez Emmanuel Macron dhe presidentja e Komisionit Evropian Ursula von der Leyen refuzuan ftesën për t’iu bashkuar bordit, ndonëse kjo e fundit dërgoi komisioneren për Mesdheun, Dubravka Šuica, si vëzhguese. Papa Papa Leo XIV gjithashtu refuzoi ftesën.