Kreu i Grupit Parlamentar të Partisë Socialiste, Taulant Balla, nga kryesia e Kuvendit ka bërë me dije se mazhoranca ka depozituar nismën për funksionimin e Autoritetit të Dosjeve.

Ashtu siç është thëne edhe më herët, PS-ja ka dy propozime: informim rreth dokumenteve të ish-Sigurimit të Shtetit dhe ndryshime në Kodin Zgjedhor.

Zbulimi se një personalitet i rëndësishëm i jetës politike shqiptare ka qenë spiun i ish-sigurimit të Shtetit në periudhën e komunizmit ka sjellë debate të shumta mes palëve, por edhe nisma.

 

Në nismat ligjore të PS-së kërkohet verifikimi i të gjithë personave edhe pse kanë marrë certifikatën e pastërtisë si dhe verifikimin e të gjitha subjekteve që zgjidhen apo emërohen në poste publike mbi pastërtinë e figurës së tyre.

 

Kjo nisëm u dorëzua fillimisht nga kryetarja e Komisionit të Ligjeve, Klotilda Bushka.

“Dy nismat tona ligjore konsistojnë në krijimin e shtratit ligjor për verifikimin e subjekteve pavarësisht nëse kanë ose jo një certifikatë të mëparshme pastërtie nën dritën e fakteve dhe të vërtetës si dhe për verifikimin e të gjitha subjekteve që zgjidhen apo emërohen në poste publike mbi pastërtinë e figurës së tyre”, tha ajo.

Miratimi i fundit

Kështu shtatori në Kuvend pritet të sjellë një maratonë të gjatë diskutimesh për premtimin e pambajtur: hapjen e dosjeve.

Diskutimi dhe miratimi i fundit ishte në vitin 2008 nën Qeverisjen e Sali Berishës.

Asokohe, Parlamenti votoi për hapjen e dosjeve sekrete të epokës komuniste për të kontrolluar kandidatët për poste.

Por opozita dhe gjyqtarët e panë atë si një manovër për të mënjanuar rivalët dhe jo për të pastruar shoqërinë nga faji.

Ligji u miratua vetëm me votat e Partisë Demokratike dhe aleatëve të saj.

Ata shpërfillën edhe apelin e Shteteve të Bashkuara për shtyrjen e votimit për të lënë kohë për konsultime të gjera.

Partia Socialiste – atë vit në opozitë –  e pa ligjin, si një përpjekje e Berishës për të shkarkuar prokurorët që hetonin korrupsionin.

Kjo pasi në ligj u shtua një klauzolë, e cila shpjegonte se politikanët dhe figurat publike të certifikuara si të pastra nga disa komisione të mëparshme nuk do të hetohen më.

Nën sundimin 40-vjeçar të diktatorit  stalinist Enver Hoxha, 5 mijë e 37 burra dhe 450 gra u ekzekutuan dhe deri në 34 mijë e 135 njerëz u burgosën, duke përfshirë 1 mijë që vdiqën dhe 308 që u çmendën.

Gjatë këtij regjimi, Sigurimi i Shtetit torturoi mijëra persona për motive politike.

Veprimtaria e tij nuk është ndriçuar asnjëherë.

Përveç zyrtarëve drejtues të Sigurimit dhe krimeve të tyre, në hije kanë mbetur edhe mijëra bashkëpunëtorë të këtij shërbimi dhune e terrori, dhe gjatë 3 dekadave në demokraci.