Një ndër pjesët më turistike në Shqipëri,  Dhërmiu fshat, është i rrezikuar nga një zjarr që prej pesë ditësh ka kapluar malin e Çikës.

Ministri i Mbrojtjes, Niko Peleshi përmes një postimi një postimi në median sociale Facebook, njoftoi se një operacion masiv është organizuar në terren për shuarjen e tij.

Sipas tij, janë angazhuar rreth 100 trupa të Forcave të Armatosura dhe 20 forca nga zjarrfikësit lokalë, Administrata e Zonave të Mbrojtura dhe punonjës të bashkisë Himarë.

Fshatra të tjerë janë po ashtu të rrezikuar nëse kushtet atmosferike favorizojnë përhapjen e zjarrit.

Maja e Çikës ka qenë ndër më të prekurat prej zjarreve në zonën e jugut të vendit edhe vitin e shkuar, ku qindra hektarë pyje, bimësi e shkurre u dogjën nga temperaturat e larta dhe pakujdesia njerëzore.