Komisioni i Pavarur i Kualifikimit (KPK), vendosi sot të shkarkojë nga detyra kreun e Prokurorisë në Sarandë, Edison Ademi. Në seancën dëgjimore, zhvilluar më 5 prill, ILDKPI konstatoi se prokurori kishte deklarime të pasakta, ndërsa rezultonte të kishte fshehje të pasurisë, si dhe është kapur në konflikt interesash.

Në seancën dëgjimore, Ademi u shpreh se një i dënuar për trafik droge i afërm me një prej anëtarëve të komisionit ka bërë çmos që rezultatet ndaj tij ndryshohen e të manipulohen. Dhe se ai vetë do ta hetonte e do t’i shkonte deri në fund kësaj çështjeje.

Ndërkohë në përfundim të seancës së sotme, prokurori Ademi replikoi me trupin gjykues të përbërë nga Genta Tafa Bungo, Lulezim Hamitaj dhe Fildes Shuli. “Do të përballeni me mua, kjo punë nuk mbaron këtu. Mbajeni mend po nuk iu çova në burg.” mësohet të jetë shprehur Ademi.

Në seancën dëgjimore, ILDKPKI konstatoi se subjekti i rivlerësimit ka bërë deklarime të pasakta, rezulton të ketë fshehur pasurinë, si dhe të jetë kapur në konflikt interesash. Ademi ka deklaruar se ka në pronësi një apartament banimi 130 m2 në Vlorë, të blerë në vitin 2012 për 45 mijë usd.

Si burim të ardhurash ai ka paraqitur shitjen e një banese të prindërve dhe një kredi 30 mijë usd. Kjo pasuri është deklaruar rregullisht nga subjekti. Por ka pasur paqartësi për një apartament banimi në lagjen “1 maji” në Vlorë të porositur tek “H shpk” në 2002, por që është prishur në vitin 2003. Nuk është deklaruar në 2003.

Sipas analizës financiare, rezulton se ka pasur aftësi financiare. Nga hetimi rezultoi se subjekti ka pasur mundësi për blerjen e pasurisë 45 mijë usd. Ai rezulton se ka blerë sende dhe mobilje me një vlerë prej 800 mijë lekësh, për të cilat nuk është deklaruar në deklaratën e vettingut.

Në 2005 rezulton që ka marrë kredi 700 mijë lekë për mobilim. Analiza financiare tregon se shuma është e justifikuar. Rezulton të ketë deklaruar edhe një automjet “Benz” në vitit 2004, të cilin thuhet se e ka shkëmbyer me një mjet të vitit 2003.

Po në deklaratat periodike subjekti ka deklaruar në vitin 2012 një makinë tip “Benz” me vlerë 800 mijë lekë. Rezulton se nuk ka pasur mundësi financiare që ta blejë. Subjekti ka deklaruar se e ka pasur dhuratë nga vëllai, me kontratë noteriale.

Në vitin 2007 është deklaruar një “Opel” 155 mijë lekë. Subjekti nuk ka pasur mundësi financiare për blerjen. Po ashtu nuk rezulton i deklaruar një mjet “Golf” 1 mijë euro.

Ai ka deklaruar edhe 3 llogari bankare, për të cilat nuk ka dyshime. Këtu përfshihet një shumë 10 mijë euro cash, kursime dhe emigracion.

KPK ka konstatuar se subjekti nuk ka paraqitur prova për të ardhurat e ligjshme të vëllait 2003-2015. Subjekti ka pretenduar se shpenzimet e vëllait janë më të ulëta se standardi i llogaritur nga ILDKPI dhe KPK.

VERITAS.COM.AL/