Kryeministri i Shqipërisë Edi Rama në deklaratë për shtyp me homologun spanjoll, Pedro Sanchez theksoi se Spanja ka qenë një ndër aktorët më të zëshëm në çeljen e negociatave.

“Kemi pritshmëri të lartë nga presidenca spanjolle që do udhëheqë BE në 2023, në hapje të një sezoni shumë i përshtatshëm për ne, që vijon pastaj me Belgjikën dhe Hungarinë. Janë tre vende në një pozicion të qartë ta palëkundur europianist, të prirura për të mbështetur Ballkanin Perëndimor”.

Kreu i qeverisë shqiptare bëri me dije gjithashtu se kanë folur për rajonin, për nismat rajonale, “mënyrën si mund ta integrojmë me procesin që nis me idenë e komunitetit të ri evropian pa anashkaluar procesin individual të çdo shteti, të krijojmë senergji të re që të na ofrojnë më shpejt”.

“Kemi diskutuar për Ballkanin e Hapur dhe për gjitha nismat në rajon që nxisin lëvizjen e lirë të njerëzve, mallrave”.

Sanchez, të premten nisi një turne në Ballkanin Perëndimor me një vizitë në Serbi.

Nga aty ai ofroi mbështetjen e vendit të tij për integrimin e rajonit në Bashkimin Evropian.

Sanchez zhvilloi bisedime me presidentin e Serbisë, Aleksandar Vuçiç.

Zyrtarët e BE-së kohët e fundit janë përpjekur të inkurajojnë qeveritë në rajon që të vazhdojnë me reformat. Kjo mes shqetësimeve mbi përpjekjet e Rusisë për të rritur ndikimin e saj në Ballkan.

Zyra e kryeministrit spanjoll tha se do të inkurajojë të gjitha vendet e Ballkanit që të zbatojnë reformat e nevojshme që do t’i lejojnë ata të përshpejtojnë anëtarësimin e tyre në BE.

Po ashtu do t’u përcjellë atyre faktin se mund të mbështeten te Madridi zyrtar gjatë presidencës spanjolle të Bashkimit në gjysmën e dytë të 2023-shit.

Kryeministri synon gjithashtu të tregojë rëndësinë që Spanja i kushton marrëdhënieve dypalëshe politike, ekonomike dhe kulturore me vendet e Ballkanit Perëndimor, si dhe mbështetjen për përpjekjet që ata ndërmarrin për të qenë pjesë e bllokut.

Mbështetje që u përcoll tashmë në një samit të liderëve të BE-së dhe Ballkanit Perëndimor të mbajtur muajin e kaluar në Bruksel përpara takimit të Këshillit Evropian.

Sanchez u zotua të fillojë negociatat me Maqedoninë e Veriut dhe Shqipërinë dhe t’i japë statusin e kandidatit Bosnjë-Hercegovinës.