Përveç hetimit penal, SPAK-u ka nisur edhe hetim pasuror për të arrestuarit gjatë operacionit ‘Metamorfoza’. Deri në këtë fazë grupi hetimor po kërkon identifikimin e të gjitha pasurive që rezultojnë në emër të personave të përfshirë në këtë dosje apo edhe familjarëve të tyre, raporton gazetari Ermal Vija.

Një sërë shkresash i janë dërguar bankave të nivelit të dytë për të bërë të mundur identifikimin e pasurive që rezultojnë në emër të tyre. Nëse këto pasuri nuk justifikohen me burimin e të ardhurave, SPAK pritet të procedojë me vënien e tyre nën sekuestro dhe kërkim në gjykatë që të konfiskohen.

Kujtojmë që operacioni ‘Metamorfoza’ me 6 të arrestuar u zhvillua një muaj më parë pas indicieve të ardhura nga autoritetet franceze, ku në rrjetin SKY apo Enchrochat, këta persona organizonin veprat kriminale. Një ditë më parë, Apeli i Posaçëm shtyu për më 31 Gusht vendimin për të arrestuarit.

Biznesmeni Pëllumb Gjoka, prokurori Xhevahir Lita, ish-shefi i operacionales, Oltion Bistri, ish-efektivi Adrit Hasanbegaj, Asmer Bilali, Edmond Preka, kërkuan masë më të lehtë sigurie se ajo e arrestit me burg.