Dalin para GJKKO për verifikimin e masës së sigurisë anëtarët e stafit të Universitetit Bujqësor të Tiranës, të cilët akuzohen për korrupsion, shkelje të barazisë në tendera dhe shpërdorim detyre.

Me urdhër të SPAK, Gjykata e Posaçme dha 24 masa sigurie, 5 “arrest në burg”, 10 “arrest në shtëpi” dhe 9 të tjerë u lanë në “detyrim paraqitjeje”. SPAK njoftoi zyrtarisht se, personat ndaj të cilëve janë caktuar masat e sigurisë po hetohen për veprat penale të korrupsionit dhe shkeljes së barazisë në tendera.

Me urdhër të SPAK u arrestuan: Eduart Terthorja, administrator i Universitetit, Altin Murto, drejtor i fondeve publike në universitet dhe Amarildo Lleshi drejtor i  prokurimeve publike në universitet, Mehmet Qoshja, specialist për fondet, ndërsa Piro Zoga, për të cilin po ashtu ka masë sigurie “arrest me burg”, nuk është bërë ekzekutimi i masës për shkak se ndodhet jashtë vendit.

Sipas SPAK, hetimet janë referuar nga policia e shtetit dhe nga hetimet janë evidentuar shkelje ligjore të personave përgjegjës të nivelit akademik në UBT, shtetasit; R.K., dhe I.K., me detyrë zëvendësrektorë në Universitetin Bujqësor të Tiranës, B.B., me detyrë përgjegjës i Departamentit të Moduleve Paraklinike në UBT, që në kohën e ideimit të projekteve dhe sigurimin e fondeve pranë Agjencisë Kombëtare për Kërkimin Shkencor dhe Inovacionin (AKKSHI ka kryer veprime në bashkëpunim me titullarin e autoritetit kontraktor, shtetasin E.T., me detyrë Administrator i UBT-së.

Veprimet e kundraligjshme të personave të mësipërm kanë konsistuar në përgatitjen e të dhënave fiktive të projekteve, me specifikime të përgatitura nga vetë operatorët ekonomik konkurues dhe fitues në këto procedura prokurimi. Pas sigurimit të fondeve nga AKKSHI kanë vijuar veprimet e kundraligjshme të autoritetit kontraktor në fazën e përgatitjes dhe gjatë zhvillimit të procedurave të prokurimit, veprimet e komisionit të përllogaritjes së fondit limit dhe specifikimeve teknike apo termave të referencës, të koordinuara në vazhdimësi me veprimet e kundraligjshme të njësisë së prokurimit dhe komisionit të vlerësimit të ofertave.

Sipas të dhënave paraprake, ndaj personave që janë lëshuar masat e sigurisë, dyshohet për veprat penale të shpërdorimi të detyrës, korrupsionit dhe shkeljes së barazisë në tendera.

Arrest me burg:

1. Edmond Tërthorja,
2. Amarildo Lleshi,
3. Mehmet Qoshja,
4. Altin Murto,
5. Piro Zoga

Arrest në shtëpi:

1. Agim Sefa,
2. Arjan Buliqi,
3. Serafin Skënderi,
4. Ilir Kusi,
5. Dritan Laçi,
6. Azem Parllaku,
7. Artur Koleci,
8. Radion Dhromi,
9. Blenard Spaho,
10. Tedi Proda

Detyrim paraqitje:

1. Enkeleida Sallaku,
2. Klara Jahollari,
3. Ilir Kapaj,
4. Erjola Kopali,
5. Klea Lekocaj
6. Romina Koto
7. Bejo Bizhga,
8. Etleva Shore,
9. Rezearta Dervishi