Nga: Mishel Kociu/ Montreal, Quebec, Canada

8 Dhjetor sot!

Thueja kangës ma të bukur që di Rini!

Rini e çoroditur, e hutuar, e shushatur…

E mpirë, e topitur, e mefshtë, e rropatur…

Rini e shpërdoruar, e konsumuar,

E përdorur, e trafikuar…

Rini sipërfaqësore, ekzibicioniste, facebookse, selfieste, instagramese, snapchatëse…

Rini kafenesh, blloku, kotësish, shkuma-party e pijesh fallco pubesh;

Rini ëndërrimtare dukjesh të gënjeshtra e makinash luksoze të vjedhura;

Rini e arsimuar me diploma të paqena universitetesh të kioskëzuar;

Rini e rritur me ushqime të skaduara, mes ndotjesh kancerogjene e pluhur ndërtimesh te pambaruara;

Rini e tufëzuar në mitingje e lëvizje sociale te blera;

Rini që me zor shquan vlerat nga antivlera;

Rini e zhgënjyer, e gënjyer, e hallakatur, e shpërndarë, pa ide a ideale;

Rini dëshmitare e një shoqërie të korruptuar e halabake,

Ku të zgjedhurit, një pjesë kriminelë, në transmetime live,

Njëri-tjetrin nga robt e shtëpisë me zë të lartë shajnë;

Rini apatike, pa vrull, pa energji, pa synime, pa pasion…

Rini që të ikë nga syte këmbët kërkon,

por dhe për këtë përton;

Rini e trishtë, e zbrazët si ambalazh i flakur;

Rini e zbehte si muzg. Rini e plakur!

Sot festohet dita jote Rini!

E ti Mos e freno kangën! Le të marri udhë.

Na të duem fort si të duem një diell.

Zgjohu Rini, zgjohu! Dili zot kesaj bote!

Rinohu, Rini! Rinohu! Bota asht e jote…

#8dhjetor #december8 #DitaeRinise

Veritas.com.al/