(FOTO- Arkiv)/

Sot pasdite, kryetar i Partisë Demokratike, Lulzim Basha, dhe pesë kryetarët e partive opozitare pjesëmarrëse në koalicion, janë mbledhur në selinë e PD. Reagimi i tyre erdhi në përgjigje të propozimit të kryetarit të Kuvendit dhe bashkëqeverisës, Ilir Meta, i cili tha se përkrah: “qeverinë e mirëbesimit të votimeve” dhe “votime vetëm me opozitën”. Në takim merrnin pjesë Nard Ndoka i PDK, Vangjel Dule i PBDNJ, Dashamir Shehi i LZHK, Kreshnik Spahiu i AK dhe Fatmir Mehdiu i PR.

Përmes një njoftimi për shtyp, koalicioni opozitar insiston në krijimin e një qeverie teknike dhe përshëndet deklaratën e djeshme të Ilir Metës për zgjidhjen e krizës opozitare.

Deklarata:

“Koalicioni Opozitar konfirmoi sot se rruga e vetme e daljes nga kriza është krijimi i qeverisë teknike, me mbështetje të gjerë politike, që do të punojë për të realizuar kushtet për zgjedhje të lira e të ndershme.

Duke përshëndetur hapin e hedhur mbrëmë nga LSI për tu bërë pjesë e zgjidhjes së krizës së rëndë politike në vend, Koalicioni Opozitar rikonfirmon gatishmërinë për nisjen e dialogut politik për qeverinë teknike dhe fton Edi Ramën të heqë dorë nga kushtet dhe të vendosë interesat e vendit dhe të qytetarëve shqiptarë para interesave personale të pushtetit të tij.

Koalicioni Opozitar shpreh gatishmërinë e plotë për të punuar me të gjitha forcat politike pa asnjë paragjykim, për krijimin e qeverisë teknike, duke i dhënë asaj një mandat të fortë për:

1-Zbatimin e plotë të ligjit të dekriminalizimit.

2-Luftë efikase kundër narkotrafikut, krimit të organizuar dhe parave të drogës.

3-Përgatitjen e zgjedhjeve të lira e të ndershme.

4-Zbatimin e reformës në drejtësi, sipas përcaktimeve kushtetuese të 22 korrikut.

Kjo është e vetmja garanci për të organizuar zgjedhje të lira dhe të ndershme ku shqiptarët të votojnë lirisht, të zgjedhin lirisht dhe vota e tyre të mos tjetërsohet”, përfundon deklaratën koalicioni opozitar.

/Veritas.com.al/