Frrok Çupi

Çudi si ndodh në këtë botë të vogël. Aq e vogël sa Steve Jobs e kishte dizajnuar si një kokërr mollë në programin e tij në Apple- Macintosh. Bota e informacionit e bëri kaq të vogël planetin e ëndrrës për ta pushtuar, sa ç’është molla e “Apple”.

Çudia ndodh bash në këtë epokë: Një lajm që vjen nga këtu afër, në parcelat shtetërore të kanabisit në Tepelenë, paralelizohet me një tjetër lajm që vjen nga larg, nga Siria ku po luftojnë militantët e Shtetit Islamik- (Islamic State) (IS). Shiko çfarë ndodhi sot; sot, e Premte 19 gusht… Sapo u përhap lajmi se gjithë Policia e Shtetit, në kupolën e vet është e mbushur me “djemtë qeveritar” të Tepelenës, thuajse në atë kohë vjen një lajm paralel nga qyteti Manbij i Sirisë.

Çfarë është paralele?

Në Manbij, militantët e IS, Shtetit (Islamik), sot, e premte, u ndjenë të rrethuar nga koalicioni i udhëhequr nga SHBA, dhe në panik, kryen aktin tragjik: Rrëmbyen civilë, i futën në kamionët e tyre dhe u nisën drejt veriut.  (Shiko BBC, lajmi i orës 11.30). Por cilët ishin civilët e marrë peng si mburoje? Militantët e IS, Shteti (Islamik) zunë pjesëtarët e familjeve të tyre dhe i futën në kamionë si mburojë përballë forcave ushtarake të Koalicionit.

Po në “Tepelenë”? Tepelena në këtë rast është fenomeni i Shtetit (Fisnor). Ministri i Brendshëm, me origjinë dhe lidhje familjare në Tepelenë, ka marrë “peng” gjithë pjesëtarë të familjes dhe i ka shpërndarë si Roje Policore për të mbrojtur krimin që po kryhet me kultivimin dhe trafikun e drogës. Sigurisht, ministri nuk e ka bërë veç me kokën e tij, por me strategjinë e kryeministrit. Me sa duket, ky,  i zënë ngushtë nga sulmi i “Koalicionit Njerëzor” që ka kapur krimin e qeverisë, i ka kërkuar ministrit të përdorë familjarët… E shikoni çfarë paraleleje mes Shtetit (Islamik) në Siri dhe Shtetit (të Drogës) në Shqipëri.

Faktin tragjik e denoncoi sot ish- kryeministri Sali Berisha.

Ministri i Shqipërisë, njësoj si në lajmin mbi Sirinë, gjithë kolonën e Policisë e ka mbushur me familjarë nga Tepelenë. Që nga Ministri, te Drejtori i Policisë së Shtetit, çdo post më poshtë , çdo zëvendës, zëdhënës, truproje, sekretare, komandant Garde, drejtor automjetesh, shefi i mbrojtjes së dëshmitarëve,… gjithkush nga Tepelena. Stacionet policore që  nga Tirana, në Gjirokastër e në Shkodër komandohen nga tepelenas…

Të gjithë janë në autokolonën e mbrojtjes së krimit. Col Chris Garver, zëdhënës i forcave të koalicionit që udhëheq SHBA në Siri, tha sot se autokolona e IS që ka rrëmbyer civilë familjarë si mburojë, thjesht po vëzhgohet, por nuk po sulmohet për shkak se ka civilë dhe “nuk duam të shkaktojmë fatkeqësi”.

Çfarë e frikëson TS, (Tepelena State), Shtetin nga Tepelena ?

Së pari, e frikëson pushteti i vet. Pushteti i vet është i ndarë në dy faza. Njëra është faza që shpalli kryeministri nën kodin “një milionë shpulla”. Kjo ishte në fillim. Në fakt votuesit e Partisë së tij ishin shumë më pak se një milionë, por ky “mori peng” Partinë e Ilir Metës dhe abuzoi me forcën e pushtetit. Pushteti u ngarkua me më shumë forcë se në vitin 1945. Barra e madhe, një ditë,  do të thyente kolonën e “kalit”. Kjo ndodhi, aq më shumë se jetojmë në epokën “Apple” kur nuk mbahen pushtetet e rëndë. Tani koalicioni është në thyerje totale; partia e Metës në koalicion nuk mund të mbajë krimin e koduar “një milionë shpulla”.

Tjetra është faza e mbajtjes së pushtetit jashtë forcës së koduar “një milionë shpulla”; domethënë jashtë sistemit të votës dhe demokracisë. Prej kohësh fuqia e pushtetit ka dalë nga fuqia e votës; qeveria nuk përfaqëson as të majtët, as socialistët, por një sekt të koduar Rilindja. Qeveria ka zgjedhur krimin si forcë për të mbajtur pushtetin. Me dorën e fshehtë të qeverisë, në gjithë vendin po kultivohet drogë. Droga po kontrollohet dhe mbrohet nga Policia e Shtetit. Fitimet e drogës do të përdoren për të ushtruar forcë mbi popullin votues, që ky popull i dhunuar të votojë përsëri Sektin. Populli dhunohet duke ia blerë votën; sigurisht me paratë e vjedhura prej tij dhe paratë që prodhon droga…

Ja kjo është frika e TS (Tepelena State). Ministri i Brendshëm, nën dorën e sigurt të kryeministrit, ka rekrutuar gjithë drejtuesit e Policisë nga “fisi” i tij Tepelenë, dhe i ka vënë roje mbi parcelat dhe krahinat e gjithë vendit. Edhe për vete ka marrë peng “familjarët”, dmth fisnorët tepelenas, që nga truproja, pastruesja, përkthyesja, parkimi, gjellëbërësi e deri te Arma e Policisë. Si në një convoy, ekzakt. Zëdhënësi, Chris Garver, i Forcave Amerikane të të koalicionit kundër IS, tha se në convoy-n e  qytetit Manbij të Sirisë “po vëzhgojnë e nuk po qëllojnë sepse nuk duan që të ketë fatkeqësi mbi civilët”.

Ndërsa militantët fisnorë të Policisë në TS (Shtetin e Tepelenës), , në çdo çast mund të shpërthejnë në sulme kundër popullsisë civile. Sot për sot kanë zgjedhur “fisin superior”, Tepelenën; konflikti mes krahinave është bërë gati. Ky, TS (Tepelena State) është një shtet i frikësuar, nuk ka superioritet si koalicioni amerikan mbi terrorin; droga e bën TS (shtetin këtu) inferior, nevrastenik, e bën që të bjerë në panik dhe në padurim. Përdorimi i narkotikëve ( sipas dëshmive të bashkëpunëtorëve) e ka bërë edhe kryeministrin si të çmendur. Ja, si ky person do të jetë fytyra e shtetit (TS) kur t’i sulet popullit me anë të forcave policore fisnore që ka shpërndarë për të shkelur gjithë Shqipërinë, me krahina e me tradita specifike.

Kjo është frika. TS nuk mund të pranojë që të humbë pushtet. Sepse atëherë ka humbur Drogën dhe vice- versa. Kështu i ka ndodhur edhe shtetit të paraardhësve të TS (Tepelena State) që në fillim, në vitin 1945, kur sapo merrnin fuqinë në dorë. Ata dërguan militantë fisnorë në krahinat e Veriut (ku plasi rezistenca  kundër komunizmit) . Toger Baba (alias Hodo Habibi, nga Kurveleshi) i dërguar special në Mirditë e në Zadrimë, ndizte zjarr mes fshatit dhe digjte gratë e burrave që rezistonin maleve. Edhe ajo ishte një drogë. Droga e pushtetit është paralele në çdo kohë.

Siç paralelizon lajmi mbi convoy- in në Manbij dhe vargun e militantëve fisnorë të Tepelenës që mbrojnë krimin e drogës në gjithë vendin.

(Veritas.com.al)