Sektori i bujqësisë ka shënuar rritje të ndjeshme, duke përmbysur raportin mes eksportit dhe importit. Në një takim me fermerë dhe sipërmarrës të bujqësisë në Elbasan, ku u diskutua buxheti prej 16.3 miliardë lekësh për mbështetjen e sektorit, Rama theksoi se rezultatet janë fryt i reformave të tre mandateve të fundit. Sipas tij, prodhimi i serave është trefishuar krahasuar me tre mandate më parë, duke arritur një sipërfaqe prej rreth 2200 hektarësh, ndërsa prodhimi i perimeve i është afruar 1.5 milion tonëve.

“Është mandati më i vështirë i qeverisjes  por këtë peshë na e kanë bërë më të lehtë shqiptarët dhe ata që na kanë dhënë 83 mandate për të kryer me sukses negociatat në BE dhe t’i vendosim vulën europiane transformimit të nisur 3 mandate më parë. Tre mandate më parë, nga kur sot kemi trefishuar prodhimin e serave dhe, si rezultat, kemi faktikisht rritur ndjeshëm konkurrueshmërinë në një sipërfaqe serash që sot ka prekur 2200 hektarë. 3 mandate nga kur kemi arritur të rrisim prodhimin e perimeve që i është afruar 1500 milion tonëve”.

Sipas tij në 9-mujorin e parë të këtij viti eksportet bujqësore kanë arritur një vlerë më të lartë se e gjithë vlera e vitit të kaluar dhe duke iu afruar objektivit prej gjysmë miliard eurosh.

“3 mandate nga ku eksportet janë rritur dhe diversifikuar, duke kapur një vlerë që këtë vit, vetëm në 9-mujorin e parë, është më e lartë sesa e gjithë vlera e vitit të shkuar dhe duke u afruar të përmbushim gjysmë miliard euro eksporte. Kemi përmbysur raportin e eksporteve me importet, që e kemi gjetur një eksport me 7 importe dhe sot jemi në 1 me 3, duke vazhduar të shkojmë drejt tendencës ulëse dhe të arrijmë objektivin e 1 eksport dhe 2 importe kur vjen puna te prodhimi bujqësor”, tha Rama.

Ai theksoi se fondi i Skemës Kombëtare është pothuajse dyfishuar dhe se pagesat direkte për fermerët do të mbyllen 100% brenda këtij viti.

“Është me rëndësi që kemi sot një buxhet për vitin e ardhshëm jo thjesht më të lartë, por shumë më të lartë krahasuar me buxhetin e këtij viti. Vetëm në skemën kombëtare shkojmë me një buxhet që është gati dyfishi i vitit që po përfundon. Ndërkohë, e tha ministri, për sa i përket skemës direkte, të gjitha pagesat do të mbyllen brenda këtij viti 100%”.

Rama theksoi rëndësinë e partneritetit mes fermerëve, qeverisë dhe pushtetit vendor, si dhe rolin kyç të dijes dhe Universitetit Bujqësor në zhvillimin e qëndrueshëm të sektorit.

“Kam besim që, nëse dijen e përfituar së bashku me dijen e një vatre që do të jetë gjithmonë më e rëndësishme për bujqësinë, ekonominë dhe zhvillimin, që është Universiteti Bujqësor, do t’i bëjmë së bashku dhe do t’i vendosim në funksion të politikave”, tha Rama