Kërkesa e 55 deputetëve socialistë për shkarkimin e Presidentit Ilir Meta ka mbërritur në Kuvend dhe ka hyrë në rendin e ditës së Komisionit të Ligjeve. Janë 9 shkelje që socialistët kanë renditur në kërkesën e tyre.

“U kam vënë në dispozicion të gjithë kolegëve të komisionit të ligjeve kërkesën. Nga ky moment komisioni ligjeve e ka futur në procedure shqyrtimin e kërkesës së 55 deputetëve”, Ky ishte deklarimi i kryetarit të Komisionit të Ligjeve, Ulsi Manja për vijimin e procedurave të shkarkimit të presidentit Ilir Meta.

Komisioni ka 15 ditë kohë për të shqyrtuar kërkesën e 55 deputetëve firmëtar të shkarkimit të kreut të shtetit.

Por socialistët duket se nuk do humbin asnjë ditë kohë.

Top-Channel ka mësuar se duke nisur nga paraditja e të mërkurës, kërkesa e shkarkimit do ta jetë në rend dite në këtë komision.

Komisioni ligjeve është përgjegjës për hartimin e një raporti ku detyra e parë është shqyrtimi ligjshmërisë së kërkesës së 55 deputetëve.

Raporti shkon në seancë për diskutim me debat duke i hapur rrugën ngritjes së komisionit të posaçëm hetimor parlamentar.

Sipas maxhorancës qeverisëse Presidenti ka konsumuar 9 shkelje kushtetuese me ç’dekretimin e datës së zgjedhjeve, ku më kryesorja cenimi i parimit të ushtrimit të sovranitetit nga ana e popullit si dhe ka cenuar parimin e të drejtës së qytetarëve si sovranë për të zgjedhur dhe për t’u zgjedhur.

Kur kanë kaluar 24 orë nga dorëzimi kërkesës për shkarkim Kuvendit, presidenca nuk ka bërë asnjë koment.

Kjo është hera e parë në historinë e Shqipërisë kur një president merret nën hetim nga parlamenti me qëllimin final shkarkimin.

Ilir Meta themelues i LSI në koalicion qeverisës me socialistët në mandatin e parë qeverisës të Edi Ramës, u zgjodh president në prillin e 2017-tës me 87 vota.

Dy vite më pas presidentit Ilir Meta i duhet të përballet me shkarkimin për të cilin duhen 94 vota e më pas certifikimi nga gjykata kushtetuese.

Por a do të jetë Ilir Meta presidenti i patë në historinë e Shqipërisë që do të shkarkohet nga Parlamenti?

Përgjigja e kësaj pyetje ndodhet në duart e socialistëve të cilët për momentin duken të vendosur për ti shkuar deri në fund shkarkimit të presidentit të zgjedhur me bekimin e tyre, por së fundmi të shpallur armik dhe akuzuar si pjesë e një konspiracioni për destabilizimin e vendit.

VERITAS.COM.AL/