Ish-kryeministri i Greqisë, Konstantinos Mitsotakis është ndarë nga jeta mëngjesin e së hënës.

I lindur në vitin 1918 në një familje politikanësh, në Hania të Kretës. Veprimtaria e tij politike kishte nisur në vitin 1946, kur u zgjodh për herë të parë deputet me Partinë e Liberalëve të Venizellosit.

Me fillimin e juntës ushtarake në prill 1967, arrestohet për disa muaj dhe pasi lirohet largohet për në Francë, nga ku kthehet në vitin 1973.

Më 1978 hyri në radhët e Demokracisë së Re. Më 1984 zgjidhet lider i Partisë Konservatore, ndërsa në vitin 1990 kryeministër i Greqisë, deri në 1993, kur pasi humb zgjedhjet, jep dorëheqjen.

Konstantinos Mitsotakis u largua nga jeta politike në vitin 2004, pas 58 vitesh në Parlament.

Dy nga katër fëmijët e tij kanë ndjekur hapat e babait. Dora Bakojanis, ish-ministre e Jashtme dhe politikane aktive e konservatorëve për vite me radhë dhe Kiriakos Mitsotakis, tashmë është lideri i Demokracisë së Re, me synimin për tu bërë kryeministër i Greqisë.

/Veritas.com.al/