“Retorikë politike. Përgënjeshtrojmë çdo akuzë”. Ka qenë kjo përgjigjja nga Ministria e Mbrojtjes në Shqipëri, i pyetur nga Albanian Post rreth akuzave që kryetari i sapozgjedhur i Partisë Demokratike, Sali Berisha, hodhi më herët për ushtarët e Forcave të Armatosura.

“Gjysma e ushtarëve kanë dorëzuar dorëheqjen në komandat e tyre, për shkak të rrogave shumë të ulëta dhe kushteve të papërshtatshme”, shkruhej në një postim nga Berisha.

“Oficerë madhorë të Ushtrisë punojnë pasdite në bare dhe restorante, për të plotësuar rrogat e ulëta që marrin”, vijonin akuzat nga Berisha.

Nga ana tjetër, ai hedh akuza të shumta edhe mbi përballimin e situatave të emergjencës civile në vend, duke thënë se “helikopterët nuk ngrihen dot në ajër, ndërsa anijet e flotës detare nuk janë në gatishmëri”.

“I bëj thirrje NATO-s të ndërmarrë një inspektim për vlerësimin e gjendjes tejet të rëndë të Forcave të Armatosura të një vendi anëtar të saj”, vijon më tej ai.

Mbi pretendimet, ndërkaq, thotë se i kanë ardhur nëpërmjet një denoncimi nga një oficer i Ministrisë së Mbrojtjes./ Albanian Post/