( Foto: Sot në presidencë, gjatë vizitës së ish- presidentit Berisha)

Zëdhënësi i Presidentit, Tedi Blushi ka reaguar sërish pas ‘presioneve’ të mazhorancës për shkarkimin e Metës.

Duke ju referuar sugjerimit të ish-deputetit të PD-së, Edi Paloka, i cili shkruan se Rama mund të shkarkojë presidentin e të vendosë njerëzit e tij, Blushi shkruan se Meta ‘do të jetë në krye të detyrës, brenda apo jashtë zyrës’.

Sipas tij, Meta është dhe do të jetë ‘ushtari i parë’ në rast nevoje, në mbrojtje të Republikës dhe Kushtetutës.

Postimi i plotë:

‘Lidhur me sugjerimin e z.Paloka që Parlamenti (e përsërisim qartë se ka vetëm 82 deputetë legjitimë, sipas deklaratës së qartë që ka bërë Presidenti Meta në Pogradec në 20 mars 2019), të shkarkojë Presidentin apo sugjerimi tjetër që të pushtojnë Presidencën kur Presidenti Meta të mos jetë në zyrë, u bëjmë të qartë të gjithëve:

‘Të mos shohin ëndrra të tilla, sepse të gjithë shqiptarët e dinë se Presidenti Meta kudo që të jetë, në zyrë apo jashtë, do të jetë në krye të detyrës dhe është i bindur se populli shqiptar do t’i përgjigjet ÇDO THIRRJE DHE DEKRETI TË TIJ NË MBROJTJE TË REPUBLIKËS DHE RENDIT KUSHTETUES.

Sqarojmë për të gjithë shqiptarët se z.Meta, jo vetëm është plotësisht i ndërgjegjshëm për përgjegjësitë e Tij Kushtetuese, si Kryetar i Shtetit, si Komandant i Përgjithshëm i Forcave të Armatosura dhe Kryetar i Këshillit të Sigurisë Kombëtare, por mbi të gjitha ai ËSHTË DHE DO TË JETË NË RAST NEVOJE USHTARI I PARË NË MBROJTJE TË REPUBLIKËS DHE KUSHTETUTËS’.

Veritas.com.al/