Kryeministri Edi Rama në mbledhjen që po zhvillon në Agjencinë Shtetërore të Kadastrës, nën praninë e Drejtores së ASHK, Dallandyshe Bici, deputetëve, ministrave dhe kryetarëve të bashkive, po prezanton reformën që do të ndodhi me Kadastrën, ku për pak ditë shërbimet do të marren të gjitha online.

Rama ua ka thënë në sy sot ministrave, deputetëve dhe kryebashkiakëve se ata kanë penguar punën dhe transformimin e Kadastrës duke e kthyer në një fole qokash.

Kadastra është penguar në mënyrë të vazhdueshme nga ju, deputetët, ministra, kryetarë bashkisë. Për të vazhduar më tutje me të gjithë ata që kanë sado pak pushtet, që i kanë dhënë vetes të drejtën të interferojnë me kadastrën për të gjitha llojet e nevojave, që nga influenca për emërimet e drejtuesve të kadastrës, influencë deri në imponim, tek influenca për punonjës në Kadastër deri në imponim, tek influenca për mbështetje për njërin apo tjetrin deri në imponim, duke e penguar kadastrën që të bëhet ajo që duhet të jetë. Banka e sigurt e pronës së patundshme të pronës së shqiptarëve”, tha Rama.