Sekretari i Përgjithshëm i NATO-s, Mark Rutte, ka deklaruar se nuk ka asnjë problem që Presidenti i SHBA-së, Donald Trump, publikoi një mesazh që ai i kishte dërguar para samitit të liderëve të aleancës që po zhvillohet në Hagë, Holandë.

“Çfarë i shkrova në atë mesazh, është fakt. Jam plotësisht në rregull që ai e ndau publikisht,” u shpreh Rutte përpara gazetarëve, teksa samiti nisi të mërkurën në mëngjes.

I pyetur nëse publikimi i këtij mesazhi mund të konsiderohej si diçka e turpshme apo e sikletshme, ai u përgjigj prerë: “Aspak.”

Mesazhi në fjalë u postua nga Trump në platformën Truth Social gjatë fluturimit të tij drejt Evropës, të hënën. Në të, Rutte lavdëronte presidentin amerikan për presionin e tij ndaj vendeve anëtare të NATO-s që të rrisin shpenzimet për mbrojtjen.

“Do të arrish diçka që asnjë president amerikan nuk ka arritur prej dekadash. Evropa do të paguajë siç duhet, dhe kjo do të jetë fitorja jote,” thuhej në mesazhin e Rutte, i cili gjithashtu i uronte Trump-it udhëtim të mbarë drejt Holandës.

Ndërkohë, Trump nuk dha një deklaratë të qartë për mbështetjen e tij ndaj nenit 5 të traktatit të NATO-s, që garanton mbrojtje të përbashkët për çdo vend anëtar në rast sulmi. Por Rutte tha se nuk është aspak i shqetësuar për këtë.

“Për mua ka qartësi absolute se Shtetet e Bashkuara janë plotësisht të angazhuara ndaj NATO-s, ndaj nenit 5, dhe po, ekziston një pritshmëri që do të përmbushet sot, që Kanadaja dhe vendet europiane të përshpejtojnë rritjen e shpenzimeve për mbrojtjen,” tha ai.