Të paktën 64 vetë humbën jetën prej serisë së tërmeteve që goditën të hënën Japoninë. Trupat e shpëtimit po kërkojnë intensivisht për të mbijetuar.

Ka shkuar në 64 numri i viktimave që kanë humbur jetën nga tërmeti shkatërrimtar në Japoni dy ditë më parë.

Ekipet e kërkim-shpëtimit kanë gjetur trupa të tjerë të pajetë nën rrënojat e ndërtesave.

Ky konsiderohet tërmeti më vdekjeprurës në Japoni deri më tani, që nga viti 2016.

Por autoritetet japoneze, përveç se janë në luftë me kohë, tashmë përballen edhe faktorin e klimës.

Në rajonin e goditur nga tërmeti, temperaturat janë shumë të ulëta ndërsa për orët në vijim janë parashikuar reshje të dendura të shiut.

Kjo rrit shqetësimin për të tjera rrëshqitje të dherave, gjë që mund të pengojë punën e ekipeve të kërkim-shpëtimit që kërkojnë për të mbijetuar nën gërmadha.

Mbi 33 mijë persona janë evakuuar nga shtëpitë e tyre, ndërsa në shumë zona të tjera ka mungesë të energjisë elektrike dhe të ujit.

Kryebashkiakët e qyteteve më të prekura nga tërmeti i kanë bërë thirrje qeverisë për të shpërndarë ndihma sa më shpejt dhe të pastrojnë rrugët, shumë prej të cilave janë bllokuar gjë që ka vështirësuar dërgimin e ndihmave ushqimore.

Tërmeti me magnitudë 7.6 goditi gadishullin Noto pasditen e së hënës.

Enti Meteorologjik paralajmëroi për këtë javë për tërmete të tjera të forta, sidomos gjatë dy ose tri ditëve të para pas lëkundjeve tepër të forta në ditën e Vitit të Ri.

Etiketa:

  • Japoni
  • Termet