SPAK ka mbyllur hetimet dhe ka dërguar në Gjykatën e Posaçme të Shkallës së Parë për Korrupsionin dhe Krimin e Organizuar kërkesën për gjykim të dy të pandehurve Fatos Lulo, ish-anëtar i Gjykatës Kushtetuese dhe Bashkim Dedja, ish-Kryetar i Gjykatës Kushtetuese.

Fatos Lulo akuzohet për kryerjen e veprës penale të “Refuzimit për deklarimin, mosdeklarimin, fshehja ose deklarimi i rremë i pasurive, interesave privatë të personave të zgjedhur dhe nënpunësve publikë ose i çdo personi tjetër që ka detyrimin ligjor për deklarim” kryer në formën e deklarimit të rremë të parashikuar nga neni 257/a/2 i Kodit Penal.

Ndërsa Bashkim Dedja akuzohet për kryerjen e veprës penale të “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka për detyrimin ligjor deklarim”, kryer në formën e deklarimit të rremë të parashikuar nga neni 257/a/2 i Kodit Penal.

 Të dy ish-anëtarët e Kushtetueses, u shkarkuan nga vettingu për mos justifikim të pasurive. Në muajin prill të këtij viti, gjykata vendosi sekuestrimin e pasurive të Fatos Lulos dhe Bashkim Dedjas.

“Vendosjen e sekuestros mbi pasurinë në zotërim të shtetasit Fatos Lulo, me sipërfaqe 172 m2, e llojit Njësi/Dyqan, e ndodhur në rrugën e Durrësit, Tiranë

Vendosjen e sekuestros mbi pasurinë në zotërim të shtetasit Bashkim Dedja, e llojit apartament, me sipërfaqe 60 m2, e ndodhur në zonën Kryemedhenj, Njësia Administrative Golem Kavajë” –thuhej në vendimin e gjykatës.

Etiketa:

  • Gjykata e Larte
  • LULO
  • SPAk