Prokuroria e Posaçme Kundër Korrupsionit dhe Krimit të Organizuar ka përfunduar hetimet dhe ka dërguar për gjykim ish-presidentin Ilir Meta, ish-bashkëshorten e tij, Monika Kryemadhi dhe tre persona të tjerë.

Meta akuzohet për korrupsion pasiv në tre raste, dy prej të cilave në bashkëpunim, pastrim parash dhe mosdeklarim pasurish.

Ish-bashkëshortja e tij, Monika kryemadhi ka të njëjtat akuza, por në rastin e korrupsionit pasiv ajo akuzohet për dy raste të kryera në bashkëpunim.

Ndër personat e dërguar për gjykim është edhe nëna e Kryemadhit, Fatime Kryemadhi, e cila akuzohet për pastrim parash. Të njëjtën akuzë ka edhe Ema Çoku, ndërsa Pirro Xhoxho, akuzohet për korrupsion pasiv në bashkëpunim.

Ky procedim penal është rezultat i një hetimi intensiv, i cili ka nisur në vitin 2019 dhe është zgjeruar në vitet pasardhëse në bazë të kallëzimeve të ndryshme. Në vitin 2024, të gjitha procedimet e veçuara u bashkuan në një të vetëm”, njoftoi SPAK.

Sipas prokurorisë së posaçme, hetimet kanë zbuluar “një sërë skemash korruptive, përdorimin e influencës dhe pushtetit politik” me qëllim favorizimin e bizneseve të caktuara kundrejt “shpërblimit të marrë apo premtuar, pastrim të produkteve të veprës penale,  dhe fshehje të pasurive apo mosdeklarimi i shpenzimeve të konsiderueshme në deklaratat periodike të pasurive”.

SPAK thotë se për hetimin ka bashkëpunuar me autoritete të Shteteve të Bashkuara të Amerikës, Austrisë, Italisë, San Marinos dhe Qipros.