Mediat ndërkombëtaret raportojnë se lideri i Koresë Veriore, Kim Jong- un ka mbërritur në Kinë, në vizitën e parë jashtë shtetit që kur ka marrë drejtimin e vendit në vitin 2011.

Burimet kanë kërkuar që të mos zbulohen për shkak të ndjeshmërisë së informatës, dhe ende nuk është e qartë se ku do të qëndrojë Kim Un, apo se me kë do të takohet.

Spekulimet rreth vizitës së mundshme të Kim Jong Un në Kinë kanë filluar të qarkullojnë në kryeqytetin kinez pasi një tren i veçantë është parë të arrijë në vend, ku besohet se në të ishte Kim Jong Un, i përcjellë nga forca të mëdha të sigurisë.

Nëse ky lajm është i vërtetë, atëherë kjo është hera e parë që lideri koreano-verior largohet nga vendi i tij që kur mori pushtetin pas vdekjes së babait, në vitin 2011.

Vizita në Kinë vjen disa javë përpara takimit të planifikuar të Kim Jong-un me Presidentin koreano-jugor Moon Jae-in dhe një takimi të mundshëm me Presidentin amerikan, Donald Trump.

Zërat për një vizitë të mundshme të një zyrtari të lartë koreano-verior në Kinë nisën të dilnin në orët e vona të së hënës, kur pamjet e një treni që zotërohet nga familja e liderit nga Koreja e Veriut u publikuan “online”.

Gjithashtu, prezenca e shtuar e forcave të sigurisë jashtë Diaoyutai State Guesthouse, aty ku kanë qëndruar më parë liderët koreano-veriorë, përforcuan spekulimet se një anëtar i familjes së Kimit ka udhëtuar në Kinë.

Marrëdhëniet e Koresë së Veriut me Kinën, një aleat tradicional i saj, u ftohën kur Kim Jong-un ekzekutoi disa zyrtarë të lartë të afërt me Pekinin. Tensionet u rritën në vitin 2017, pas disa testimeve raketore nga ana e Veriut.

Tong Zhao, një ekspert i çështjeve të Koresë së Veriut në Pekin, e shpjegoi kështu këtë vizitë: “Koreja e Veriut kërkon garanci në prag të takimit me Presidentin Donald Trump. Takimi me Amerikën është shumë i rëndësishëm, por edhe shumë i rrezikshëm. Nëse takimi dështon, SHBA mund të deklarojë se diplomacia nuk bën më punë dhe të kalojë në veprime ushtarake. Kina ka një marrëveshje të përbashkët mbrojtjeje me Korenë e Veriut, sipas së cilës, nëse një nga palët kërkon ndihmë ushtarake në rast sulmi, pala tjetër duhet ta ndihmojë me të gjitha mundësitë që ka”.

Veritas.com.al/