![](https://veritas.com.al/wp-content/uploads/2023/08/ECUADOR-ELECTION-27_1691629084884_1691629105011.jpg)
Kandidati në zgjedhjet e ardhshme presidenciale të Ekuadorit, i cili bëri fushatë kundër korrupsionit dhe bandave, është qëlluar për vdekje në një tubim të fushatës.
Fernando Villavicencio, një anëtar i asamblesë kombëtare të vendit, u sulmua teksa po largohej nga takimet elektorale në kryeqytetin Quito, të mërkurën.
Ai është një nga kandidatët e paktë që pretendon lidhje mes krimit të organizuar dhe zyrtarëve qeveritarë në Ekuador.
Një bandë kriminale e quajtur Los Lobos (The Wolves) ka marrë përgjegjësinë.
Los Lobos është banda e dytë më e madhe në Ekuador me rreth 8,000 anëtarë, shumë prej të cilëve janë pas hekurave.
Banda ka qenë e përfshirë në një numër përleshjesh vdekjeprurëse të kohëve të fundit në burgje, në të cilat dhjetëra të burgosur janë vrarë brutalisht.
Një fraksion i shkëputur nga banda e Los Choneros, Los Lobos besohet të ketë lidhje me Kartelin e Gjeneratës së Re Jalisco me bazë në Meksikë (CJNG), për të cilin trafikon kokainë.
Dyshimi për vrasjen kishte rënë fillimisht te Los Choneros, i cili kishte kërcënuar zotin Villavicencio javën e kaluar, por Los Lobos mori përgjegjësinë në një video në të cilën anëtarët e bandës të veshur me kapuç ndeznin shenjat e bandës dhe tundnin armët e tyre.
Ekuador ka qenë historikisht një vend relativisht i sigurt dhe i qëndrueshëm në Amerikën Latine, por krimi është rritur në vitet e fundit, i nxitur nga prania në rritje e karteleve kolumbiane dhe meksikane të drogës, të cilat kanë infiltruar në bandat kriminale lokale.
Vrasja vjen më pak se dy javë përpara zgjedhjeve presidenciale, në të cilat çështja e pasigurisë shfaqet si shqetësimi kryesor.