(Ministri i Punëve të Brendshme, Xhelal Sveçla dhe Drejtori i përgjithshëm i Policës së Kosovës, Samedin Mehmeti.)

Ministri i Punëve të Brendshme, Xhelal Sveçla, në konferencë të jashtëzakonshme për media ka bërë të ditur se Polica e Kosovës është sulmuar për tri herë radhazi në Veri të Kosovës.

Sulmi i fundit, ka thënë Sveçla, ka ndodhur mëngjesin e sotëm.

“Rreth orës 07:40 ka ndodhur një sulm ndaj policisë së Kosovës të cilët kanë qenë duke shkuar për ta bërë ndërrimin në pikat kufitare”.

“Ky sulm tashmë me granate dore dhe A47 si një akt terrorist është bërë me qëllim të frikësimit të zyrtarëve policorë, por edhe të gjithë qytetarëve të Kosovës”, deklaroi Sveçla, që në konferencë ishte bashkë me Drejtorin e Policisë, Samedin Mehmeti.

Sveçla, bëri të ditur se sulmet janë duke u kryer në forma të ndryshme, mirëpo në të njëjtën zonë.

“Grupe të ndryshme në tri ditët e fundit kanë realizuar katër sulme në atë zonë”.

(Ministri i Punëve të Brendshme, Xhelal Sveçla).

“Sulmi i parë ka ndodhur duke vendosur iriqë metalikë në rrugën nacionale në kohën për afërisht të njëjtë me sulmet e sodit, me qëllim që të pamundësojnë punën e policisë së Kosovës në të njëjtën kohë të rrezikojnë drejtpërdrejt jetën e qytetarëve të Kosovës”.

Gjithashtu, theksoi se njëri ndër sulmet është kryer edhe me armë zjarri.

“Sulmi i dytë ka ndodhur me gjuajtën me gurë në veturën e policisë së Kosovës, sulmi i tretë ka ndodhur mbrëmë në afërsi të portit policor i cili bën sigurimin e pengesave të rrugëve ilegale është gjuajtur me armë zjarri”.

Ai shtoi se shumë shpejt policia e Kosovës do të vijë me informacione të reja sa i përket situatës aktuale.

Edhe drejtori i përgjithshëm i Policës së Kosovës, Samedin Mehmeti, bëri të ditur detaje nga këto sulme që kanë ndodhur ndaj PK-së.

“Sikurse ju njoftoj edhe ministri i punëve të brendshme, prej datës 14 ne kishim katër sulme të sinkronizuara të organizuar ndaj policisë së Kosovës në një territor i cili është i ndërlidhur, vendet në të cilat janë bërë sulmet kanë qenë të ndërlidhura”.

Drejtori i përgjithshëm i Policës së Kosovës, Samedin Mehmeti.

Drejtori i PK-së, bën të ditur se është e qartë se kemi të bëjmë me një grup të organizuar.

“Kjo na bën me dije se kemi të bëjmë me një grup të organizuar i cili ka për qëllim që të pengojë policinë e Kosovës dhe aksionet që ka të bëjë policia në luftën kundër kontrabandës dhe tregtie e ndryshme tjera ilegale që zhvillohen në këtë pjesë të kufirit të Kosovës”.

Ndërsa ka sqaruar se, “Njësiti Kundër Terrorit dhe Prokuroria Speciale është duke u marrë me rastin”.

Ndryshe, katër komunat në veri të Kosovës, Mitrovica e Veriut, Leposaviqi, Zubin Potoku dhe Zveçani janë të banuara me shumicë serbe.