Një ditë pas komunikimit të akuzave ndaj Sali Berishës dhe Jamarbër Malltezit, SPAK mori të pandehur ditën e sotme për të njëjtën çështje biznesmenët Fatmir Bektashi dhe Xhimi Begeja.

Në përfundim të hetimit, SPAK vlerësoi t’i komunikojë Bektashit akuzën e “korrupsionit aktiv të zyrtarëve të lartë shtetërore” dhe “pastrim të parave”, ndërsa Begesë akuzën e “pastrimit të parave”.

Ditën e djeshme, ish-kryeministri Berisha u mor i pandehur për veprën penale “korrupsion pasiv i funksionarëve të lartë shtetërorë dhe të zgjedhurve vendorë”, shkruan A2.

Ashtu siç ka ndodhur prej 30 dhjetorit të vitit të kaluar, Sali Berisha do të vijojë të qëndrojë në banesën e tij në rrugën “Mustafa Matohiti”, nën masën e sigurisë “arrest në shtëpi”, që u vendos nga GJKKO.

Prokurorët që po hetojnë dosjen “Partizani”, i komunikuan po ashtu akuzat për veprat penale “korrupsion pasiv” dhe “pastrim parash”, dhëndrit të kryetarit të PD, Jamarbër Malltezi.