Kryeministri Edi Rama ka komentuar vendimin për të dalë në kundërshtim me një deklaratë të politikës së jashtme të BE-së, sa i përket situatës së Kosovës dhe Serbisë.
Në një konferencë për mediat të mbajtur në Romë me zv/Kryeministrin dhe Ministrin e Jashtëm italian, Antonio Tajani, kreu i qeverisë tha se dalja kundër deklaratës së bërë nga Borrel më 19 shtator, lidhet me faktin se ai qëndrim nuk reflekton problematikën e krijuar në veri në ditët e fundit.
Qëndrimi ynë për herë të parë në kundërshtim me një deklaratë të politikës së jashtë të BE. Ky qëndrim lidhet me faktin se deklarata e BE, është një deklaratë e cila jo se në vetvete ka problem, pasi adreson gjithçka që është thënë më parë nga Borrell, në lidhje me detyrimet e Kosovës. Por nuk i përgjigjet realitetit të ditëve të fundit. Nuk mund të linjëzohemi me BE, pa parë një deklaratë të dytë që adreson problematikën e ditëve të fundit. Ku ka ndodhur një zhvillim dramatik. Është vrarë një efektiv i policisë së Kosovës nga një grup kriminal që ka qenë i investuar. Kjo për ne është e papranueshme. E dënueshme. Joeuropiane dhe sepse është sinjali më i keq që mund të jepte Serbia në këtë moment.
BE të vërë alarmin në nivelin më të lartë. Të përdorë të gjithë instrumentat në dispozicion për t’i kthyer mesazhin e duhur, këtij mesazhi krejtësisht të paparanueshëm që vjen nga shpallja e zisë kombëtare në Beograd. Derisa të ketë një deklaratë të dytë, për të vendosur me drejtësi një gjykim për ditët e fundit, ne nuk do të linjëzohemi me deklaratën e parë. Në këtë pikë, linja jonë është 100 për qind e BE, por është momenti për të dënuar me zë të lartë atë që ka ndodhur në veriun e Kosovës dhe me atë që ka ndodhur në Beograd.
Edi Rama, Romë
75 423 
