“Votimi i Diasporës”, një proces që është për herë të parë, ku emigrantët shqiptarë tashmë do të votojnë në zgjedhjet parlamentare të 11 majit.

Gjatë intervistës, në “News Line” në ABC News, anëtari i Komisionit Rregullator, në KQZ Dritan Çaka, foli për ecurinë e këtij procesi duke ndarë rëndësinë dhe domosdoshmërinë, por megjithatë nënvizoi se ka pasur edhe problematika të vogla, por që nuk kanë shkaktuar shqetësime.

Gjithashtu theksoi se tashmë rregullat janë të përcaktuar, duke sqaruar se vota familjare është e ndaluar.

“Ka shkuar relativisht mirë, patjetër që ka pasur ndonjë probleme, por të vogla. Shërbimi postar është zgjedhur ai ndërkombëtari me DHL dhe besoj është shumë korrekt dhe ndër nga më të mirët. Është një proces i ri, por përgjithësisht jam i kënaqur. Mund të ketë edhe pikëpyetje që mund të vijnë nga forca të ndryshme politike. Por problemet që mund të ketë shfaqur janë zgjidhur”, tha ai.

“Fleta e votimit do të ketë një kod specifik, theksoi,-Dritan Çaka duke shtuar se kjo e bën edhe më të vështirë falsifikimin.

“Fleta e votimit është e njëjtë si për brenda vendit ashtu edhe për jashtë vendit. Ka disa elementë sigurie që e bëjnë shumë të vështirë falsifikimin e fletës së votimit. Duhet theksuar që nuk printohen në Shqipëri, por në Slloveni. Një kompani ndër më të mëdha. Besoj se nga koncepti i sigurisë është e sigurt. Zarfi do të jetë i pa identifikueshëm dhe nuk do të ketë asnjë shënim mbi të”, u shpreh më tej ai.