Agjencia Kundër Korrupsionit në Kosovë ka filluar një procedurë zyrtarë për verifikimin e pasurisë së presidentes Vjosa Osmani.

Sipas mediave në Kosovë, ky hap erdhi pasi u vunë re dallime të dukshme në deklarimet e pasurisë së Osmanit për vitet 2024 dhe 2025.

Nisja e verifikimeve erdhi pas shqetësimeve në lidhje me ndryshimet në sasinë e pasurisë së deklaruar në formularët zyrtarë të zyrtarëve publikë.

Ndryshimet lidhen kryesisht me rritjen e kursimeve, si dhe shtimin e shumës së parave të gatshme të deklaruara.

Në dokumentet e dorëzuara për vitin që sapo lamë pas, vihet re lëvizje e konsiderueshme në krahasim me një vit më parë dhe ky detaj e  shtyu agjencinë kundër korrupsionit të ndërmarrë verifikime të mëtejshme sipas ligjit.

Në deklarimet e vitit 2025, Osmani ka raportuar se bashkë me bashkëshortin e saj zotërojnë një banesë tjetër në Prishtinë.

Por jo vetëm kaq, Osmani zotëron prona edhe jashtë vendit, konkretisht tokë dhe një shtëpi shtesë në Australi.

Megjithatë pas raportimeve në lidhje me verifikimin e pasurisë, nga Presidenca e Kosovës kanë thënë se nuk kanë informacione të tilla.

Këshilltari i presidentes Osmani tha se ajo mirëpret çdo lloj verifikimi nga çdo institucion, që është i bazuar në pavarësi, ligj dhe fakte, por jo në fushata njollosjeje.