Në kuadrin e “Javës së Europës”  që organizon në Shqipëri Delegacioni  i Bashkimit Europian, nga dt 6 deri më 10 maj, Ambasada e Greqisë në Tirane bashkë-organizon me përfaqësinë e BE, një aktivitet me temë “ Shanse arsimimi për fëmijët që nuk dëgjojnë  në Shqipëri” , i cili do të zhvillohet në  Pallatin e Kongreseve  më 7 maj,  nga ora 15.00 – 16.00.

Do të përshëndesë  Ambasadori i Bashkimit  Europian z. Luigi Soreca, ndërsa   Ambasadorja e Greqisë zonja Eleni Sourani do të mbajë fjalën e hapjes së aktivitetit. Në aktivitet, Shoqata Kombëtare e Personave që nuk  dëgjojnë  të Shqipërisë, ANAD,  do të prezantojë   rezultatet e studimit “Persona që nuk dëgjojnë  në Shqipëri”,  dhe do të ketë diskutime, me pjesëmarrjen  e përfaqësuesve të Ministrisë së Arsimit, Rinisë dhe Sporteve të Shqipërisë.

Me mbështetjen e Ambasadës së Greqisë, në aktivitet do të marrin pjesë  përfaqësues të Federatës  së Personave që nuk Dëgjojnë në Greqi , (OMKE), dhe do të paraqesin disa nga praktikat më të mira që zbatohen në Greqi , por do të bëjnë edhe propozime  për bashkëpunim  midis shteteve anëtare të Bashkimit Europian dhe Shqipërisë, me qëllim përmirësimin e shkollimit ne vend, të fëmijëve që nuk dëgjojnë.

Aktiviteti do të shoqërohet  nga një ekspozitë me  vepra të fëmijëve të  Shkollës së Tiranës për Fëmijët që nuk Dëgjojnë, që u realizua nën kujdesin e  piktorit Kosta Zhonga.

Veritas.com.al/