![](https://veritas.com.al/wp-content/uploads/2019/12/auto_isa_mustafa_albin_kurti_takimi_11_dhjetor_20191576083685.jpg)
Shkruan: Koha.net/
Katër ditë pas zgjedhjeve të 6 tetorit, Albin Kurti e Isa Mustafa nisën me entuziazëm përpjekjet për të formuar Qeverinë.
Vetëvendosja, parti fituese e zgjedhjeve të parakohshme, është shprehur optimiste se me LDK-në do të merren vesh lehtë e shpejt, raporton KTV.
Pas takimit të parë paszgjedhor ndërmjet Mustafës e Kurtit, ky i fundit paralajmëroi marrëveshje me partinë e dytë që u rendit në zgjedhje.
Kandidatja për kryeministre, Vjosa Osmani, gruaja më e votuar në zgjedhjet e tetorit, tha se marrëveshja do të negociohet nga grupet punuese përkatëse.
Takimet e grupeve punuese që nisën më 18 tetor, rezultuan siç e quajtën të dyja partitë, me harmonizim të programit qeverisës.
Gjatë tetorit e nëntorit, takimet kanë qenë të shpeshta. Kreu i Vetëvendosjes, Albin Kurti, deklaroi se me LDK-në do të arrijnë marrëveshje 72 orë pas certifikimit të zgjedhjeve.
Por, edhe pas tri javësh të certifikimit të rezultatit nga KQZ-ja, marrëveshja nuk u arrit.
Madje, Kurti përdori edhe terminologji të muzikës klasike për t’i përshkruar bisedimet me LDK-në.
Ky takim i 22 nëntorit duket se i vuri në pah mospajtimet dhe kërkesën e LDK-së, që posti i presidentit të jetë pjesë e marrëveshjes së koalicionit.
Nga restorantet e kryeqytetit, takimet Kurti-Mustafa u zhvendosën në zyrat e Kuvendit të Kosovës.
Ndonëse thanë se janë pajtuar për programin qeverisës, çështja e ndarjes së posteve ka bërë që marrëveshja të ngecë.
Pavarësisht kësaj, takimet vazhduan edhe të premten e të shtunën e kaluar, por pa rezultat.
Ngërçi i bisedimeve Vetëvendosje – LDK, ka shkaktuar përplasje edhe brenda LDK-së.
Krejt kjo dhe pasi Albin Kurti e Vjosa Osmani u panë bashkë, duke u regjistruar si deputet.
Këtë gjë, Agim Veliu e cilësoi si presion i Osmanit dhe Kurtit ndaj LDK-së.
E, Vjosa Osmani iu kundërpërgjigj atij, duke i thënë se nuk i jep llogari dhe se ndërlikuesit e marrëveshjes tashmë dihen.
Ndërkaq, posti i presidentit që e do me çdo kusht LDK-ja, deri tani del të jetë pika ndarëse me Vetëvendosjen, pasi synimin për t’u bërë president nuk e ka mohuar kreu i LDK-së, Isa Mustafa.
Dakordimi i vetëm pothuajse pas çdo takimi, ka qenë marrëveshja ndërmjet tyre për t’u intensifikuar bisedimet.
VERITAS.COM.AL/