Ministri i Jashtëm i Francës, Jean-Yves Le Drian, ka paralajmëruar se situata në Ukrainë mund të përkeqësohet më tej nën bombardimet e pamëshirshme nga Rusia.

“Në të vërtetë, është e mundur që më e keqja është përpara nesh”, tha Le Drian në një intervistë televizive me “France 2” të enjten, duke shtuar se konflikti kishte hyrë në një “logjikë rrethimi”.

Sipas tij për shkak të rezistencës së ashpër nga ushtria dhe populli ukrainas, shpresa e Rusisë për t’i dhënë fund luftës shpejt po shuhet gradualisht.

Rritja e vazhdueshme e forcave rreth qyteteve kryesore të Ukrainës si Kharkiv dhe kryeqyteti, Kiev, sipas Ministrit francez mund të nënkuptojë se lufta po hyn në një fazë rrethimi.

“Ju e dini se rusët janë mësuar të luftojnë luftëra në një logjikë rrethimi, mbani mend Alepon dhe mbani mend Groznin”, tha ai.

Presidenti rus Vladimir Putin po bëhet gjithnjë e më i izoluar, shtoi Le Drian, duke cituar votën e Asamblesë së Përgjithshme të OKB-së për të dënuar pushtimin rus të Ukrainës të mërkurën, në të cilën vetëm katër vende votuan në mbështetje të Rusisë.

“Njerëzit nuk e dëgjojnë më atë, sepse njerëzit nuk i besojnë më pasi ai ka hequr dorë vazhdimisht nga angazhimet e Rusisë, nënshkrimi i Rusisë dhe gjithashtu angazhimet e tij”, tha Le Drian.

Megjithatë, është ende e rëndësishme të ruhet dialogu me Moskën, sepse Putin-i dhe presidenti ukrainas Volodymyr Zelensky nuk po flasin drejtpërdrejt, tha Le Drian, duke shtuar se Franca duhet të luajë rolin e ndërmjetësit.

Ai përsëriti gjithashtu nevojën për të vendosur një armëpushim si një parakusht për negociatat e paqes midis Moskës dhe Kievit, duke shpjeguar se Bashkimi Evropian vendosi paketën e tij të sanksioneve me shpresën për të sjellë një armëpushim.

Ne nuk mund të kemi dialog pa një armëpushim”, tha Le Drian. “Nuk mund të negociohet me një armë në kokë”.

Ministria e Jashtme franceze lëshoi një deklaratë të enjten duke këshilluar qytetarët e saj të largohen nga Rusia.

“Rekomandohet fuqimisht që shtetasit francezë, prania e të cilëve dhe e familjeve të tyre nuk është thelbësore në Rusi, të bëjnë marrëveshje për t’u larguar nga vendi me lidhjet ende ekzistuese”, thuhet në deklaratë.