![](https://veritas.com.al/wp-content/uploads/2019/05/macron-merkel_2594.jpg)
Përpara samitit ku do të diskutohen rezultatet e zgjedhjeve të Parlamentit Evropian, kancelarja gjermane Angela Merkel dhe shefi i Elizesë, Emmanuel Macron, kanë pasur një përplasje, shkak i së cilës është bërë mënyra e përzgjedhjes së presidentit të ri të Komisionit Evropian.
Kreu i shtetit francez këmbëngul që procesi të mos jetë automatik. Merkel, nga ana tjetër, e bëri të qartë se Gjermania vazhdon të favorizojë zgjedhjen e kandidatit kryesor nga partia fituese e zgjedhjeve të së dielës.
Krerët e bllokut evropian pritet të mblidhen në Bruksel për të folur mbi votimet në të gjithë BE-në, por edhe për caktimin e drejtuesve të rinj të institucioneve të Bashkimit Evropian. Kancelarja gjermane këmbëngul që krerët e BE-së t’i marrin këto vendime sa më shpejt.
“Ne duhet të gjejmë sa më parë një zgjidhje, duke qenë se Parlamenti i ri do të mblidhet në fillim të qershorit dhe natyrshëm preferohet që deri në atë kohë të kemi një propozim nga Këshilli Evropian”, ka thënë Merkel.
Ai që mbështesin aleanca konservatore CDU/CSU dhe partneri i saj i koalicionit qeverisës SPD është procesi “Spitzenkandidat”, sipas të cilit kandidati i përzgjedhur nga partia fituese votohet në PE si presidenti i ardhshëm i Komisionit Evropian.
Manfred Weber është kandidat i PPE/EPP për president të Komisionit Evropian. E ndonëse pësoi humbje të mëdha të dielën, Partia Popullore Evropiane dhe kandidati i saj kryesor, gjermani Manfred Weber, sërish dolën të parët.
Veritas.com.al/