Frrok Çupi

Prej 125 vjet, Donald Trump është i vetmi president që nuk mban qen; hip e zbret nga avionët në Andrew Air Force Baze pa tërhequr pas vetes një qen, sipas modës. Shkon e vjen nëpër shtetet e Amerikës, e kthehet vonë në shtëpi, me një barrë punë e halle. Asnjëherë deri më sot, presidenti Trump, nuk ka marrë avionët e ekuipmentin e tualeteve dhe të zyrave pompoze për të shkuar në mitingje jashtë Amerikës ku e presin mijëra që e duartrokasin dhe ky mban fjalimin e rrafshët ‘and happy end’. I vetmi që nuk e ka bërë, as ka eksportuar demokraci as luftë.

Nesër në Shtëpinë e Bardhë, nën kujdesin e Donald Trump, nisin bisedimet Kosovë-Serbi për fillimin e epokës pa konflikte në Ballkan. Por nuk ka as kërcënime, as bomba, as tam- tame për fitoren globale; gjithçka do të zhvillohet në një hapësirë diskrete pune në Amerikë. Si do të pritet kjo këtu? Me siguri shumica e autoriteteve dhe politikanëve të rënë por ende të pa rënë, po e përgojojnë takimin me Trump si një takim ‘jo korrekt’, ‘i një presidenti të kritikuar’ në botë dhe që ‘nuk i do’ shqiptarët… Prej ditësh mediat në shqip po flasin me shpresë për ardhjen e modelit të Biden- model që ra në vitin 2016. S’ka rëndësi pse e duan atë model, apo pse u mësua lëkura me modelin ‘me qen’ edhe pse nuk bën ndonjë punë. Në Kosovë, familja Biden, Allbright, Wesli Clark, Hillary, etj., kanë lënë lidhur biznese të shumta private, që nga inertet e deri te veshjet. Edhe një politikan ‘bukurosh’ dhe ‘korrekt’ shqiptar në Malin e Zi po e kthen rrotën e politikës së shtetit këtu në veri- kundër Kosovës. Ka një ferment të tërë anti- perëndimor mes politikanëve shqiptarë  që nuk e duan as Kosovën as Shqipërinë në Perëndim..

Por ‘i keqi’ mbetet Donald Trump. Presidenti nuk ka tribuna maniake.

Në vendin tonë të vogël aleat, sot e kësaj dite politikanë djaj e masakrues të vendit, zihen me njëri tjetrin se kush i ka ndenjur më afër presidentit amerikan në mitingun e radhës. Po ç’ne pas kësaj?… Pas kësaj politikanët që e grabitën dhe e rrënuan vendin krijojnë  ‘klimën’ e mbijetesës fajtori bashkë me viktimën. Mburrja para popullit është skllavërim i tij. Politikanët në këtë vend ku jemi, as e kanë dashur e as e duan modelin e Trump. Këtu edhe ‘të djathtët’ janë më të majtë se të majtët e shpallur, këtu edhe Demokratët- alias aleatë- nuk kanë dashur të besojnë se Trump fitoi edhe pasi korri fitoren në 2016. Si ta kishin nuhatur se këtu politika nuk ka konservatorizëm as origjinalitet, të gjithë kokat e egra që luftuan përbindshëm kundër Trump në Amerikë, ditën e fitores u grumbulluan në Tiranë. Që natën e fitores së Trump, 8 Nëntor 2016, u nisën me avionë drejt Tiranës: drejtori i CIA- John Brannan dhe shefi i Sigurisë Kombëtare James Klapper, e të tjerë; çfarë nuk ka ndodhur në histori. Se çfarë bënë gjithë ato ditë në Shqipëri- asnjë zot nuk e di; por të paktën mund të thuash se ndanë më kolegët këtu hidhërimin e fitores së një presidenti ndryshe nga të tjerët.

Donald Trump i ka dhënë Amerikës, dhe një bote të tërë, modelin e presidentit ‘pa qen’, të presidentit pa korrektësi maniake politike. Në pjesën më të madhe të gjërave ky president është ndryshe nga të tjerët: Njeri si njerëzit rreth vetes, origjinal, ‘i çmendur’ por që ajo çmenduri e çuditshme është çelësi i suksesit të Trump. Kësaj here e ka nisur fushatën e zgjedhjeve presidenciale duke dalë nga dyert glorifikuese të një Shtëpie të Bardhë; ndërsa pesë vjet të shkuara Donald Trump zbriste nga shkallët lëvizëse me shkëlqim në Trump Tower për t’iu drejtuar kombit amerikan me një ofertë presidenciale pa asnjë model tjetër si ai. I vetëm, veç me kombin amerikan dhe interesat e kombit dhe me sloganin ‘Make America Great Again’ përdore si një qen besnik. Sot e kësaj dite Trump ka end e fuqinë për të tmerruar mediat dhe për të magjepsur njerëzit. Një botë e tërë, ajo e mësuara me modelin e presidentit me qen, ka folur e vazhdon të bërtasë e të qajë për ‘shkatërrimet’ e Trump, por ai dhe njerëzit e tij janë në gjendje të flasin e të merren vesh drejtpërdrejt me votuesit.

A po mësohet Bota me një president ‘pa qen’, dmth., jashtë ‘fashion’? Kjo është e vështirë, punë që do kohë të gjatë, ndoshta aq kohë sa mori krijimi i modelit shkatërrimtar të elitës së vjetër anti- popullore të pas Luftës së Dytë. Amerika, kontinenti që bëri ndryshimin, po e ndjen përditë:

Sot kandidati për mandatin e dytë në Shtëpinë e Bardhë, Trump, ka kapur katërfishin e përkrahjes dhe simpatisë popullore përballë kandidatit tjetër Biden, shkruan ‘The Spectator’. Viti 2016 që solli presidentin ‘ndryshe’, u konsiderua një vit i çmendur; por ky vit 2020 është një vit akoma më i çmendur. Edhe këtë herë, Trump do të jetë kundër mungesës së shanseve që i japin, por do të fitojë. Edhe këtë vit mbetet përsëri ‘i urryer’, ‘përçarës’, me sondazhe pas rivalit- por papritur do të dalë në krye. Sekreti është shumë i thjeshtë, edhe pse kundërshtari bën sikur nuk e kupton. Merrni vetëm dy konventat (e Biden dhe e Trump) që sapo u mbajtën në Amerikë. Prezantimi i Trump ishte më i butë, më tokësor, më afër nesh. Ndërsa Biden kishte me vete zhurmën, kishte pas fuqinë e Hollywood- it, industrinë e argëtimit! Humbi Biden me fuqi shkëlqyese bosh. Atij i mungon origjinaliteti, që Trumpi e ka në qelizë. E keni vënë re edhe një gjë që tani amerikanët po e mbajnë në çdo bisedë? Ja këtë: Biden e lexoi fjalimin në konventë si një nxënës i shkëlqye, rrjedhshëm, pa pengesë, njësoj si të ishte duke lexuar në teleprompto. Amerikanët e krahasuan me fjalimin e Biden kur u zgjodh zëvendës në vitin 2008… Domethënë siç ishte, film i shikuar.

Trump është konsideruar si ‘i tmerrshëm’. Shumë prej amerikanëve kanë thënë se nën udhëheqjen e tij Amerika ‘po prishet’. Por votuesit besojnë te Trump. Amerikanët panë një ekonomi të fuqishëm nën udhëheqjen e Trump. Edhe në kulmin e krizës së Covid, punësimi po rikthehet. Vetëm në qershor, kulm i krizës, në Amerikë u shtuan 4.8 milionë vende pune. ‘Ekonomia më e madhe që bota ka parë’ siç e quan Trump, që u ndërtua tërësisht nga përpjekja e tij, po gjallëron e zien përsëri.

I ndryshmi prej Trump nuk është ‘i tmerrshëm’, madje është delikat, as  vezën s’e thyen kur ecën; është krejt korrekt deri në maniakëri. E dini sa ‘polite’ ishte Biden në fjalimin e Konventës? Biden e përmendi vetëm një herë Kinën; edhe pse Amerika mbarë e di që virusi që vrau 180 mijë amerikanë erdhi nga Kina. Por Biden e foli vetëm një herë dhe atëherë si t’i thoshte shokut Xi: ‘ah, më fal, sir’. Trump e përdori fjalën për t’u përplasur me të keqen që iu kanoset amerikanëve. Ai e quajti Covidin ‘virusi Kinë’. Demokratët e akuzuan Trump që në prill si ‘Kinafobik’, por kur virusi Kinë përlau botën, Amerikës nuk i duhej më delikatesa. Amerikanët i kemi parë duke mbidozuar me opioide të prodhuara nga Kina dhe tani shpresat e tyre janë goditur nga një virus që prodhohet po nga Kina- tha Trump.

Kohët janë apokaliptike dhe ndryshimet po kështu. Tanimë nuk mund të marrë frymë Bota në një ‘tub’ ku nuk ishte ngopur kurrë më parë, të paktën prej 75 vjetësh. Sa e rëndë është rruga!? Edhe pas rizgjedhjes së Trump do të jetë po kaq e rëndë. Gazetari amerikan Tucker Carlson shkruan se ‘sikur të mos fitojë Trump, Amerika humb përgjithmonë; por edhe sikur të fitojë- prapë do të ketë këto konflikte shkatërrimtare që po ziejnë në Amerikë’.

Ndryshimi duket sikur është te presidenti pa qen përdore, alegorikisht.

VERITAS.COM.AL/