Ish-kryeprokurori shqiptar, Adriatik Llalla – i shpallur në kërkim ndërkombëtar nga Prokuroria e Posaçme Kundër Korrupsionit dhe Krimit të Organizuar (SPAK) – është arrestuar të hënën e 13 dhjetorit në Itali.

Lajmi është bërë i ditur nga burime pranë Prokurorisë.

Më 22 shtator, policia shkoi në banesën e Llallës, për të zbatuar urdhrin e arrestit si masë e vendosur nga Gjykata e Posaçme kundër Krimit të Organizuar dhe Korrupsionit, por ai nuk ndodhej aty.

Pasi nuk u gjet në banesën e tij, policia e shpalli në kërkim kombëtar.

Vendimi për dënimin e ish-kryeprokurorit, qëndroi në fuqi edhe pas apelimit që ai i bëri çështjes rishtazi.

Dy vjet burg dhe pesë vjet përjashtim nga çdo post dhe funksion publik.

Avokati i tij, Sokol Hazizaj, pasi doli nga seanca gjyqësore e 22 shtatorit, ku Llalla nuk ishte sërish i pranishëm për arsye të pretenduara shëndetësore, deklaroi publikisht, se nuk kishte dijeni mbi vendndodhjen e ish-kryeprokurorit.

Madje, ai shtoi se kishte disa kohë që nuk e kishte parë.

Hera e fundit kur kishte kontaktuar, ishte me rastin e dhënies së një raporti mjekësor, ku shkruhej se Llalla e kishte të pamundur të merrte pjesë në seancë, pasi vuante nga një sëmundje e pashërueshme.

Një sëmundje, e cila Llallën, minimalisht, nuk e ka lënë në shtëpi. Maksimalisht ka hipoteza se ai mund të jetë jashtë shtetit, edhe pse e kishte të ndaluar të lëvizte, deri në marrjen e vendimit ndaj tij.

Akuzat ndaj Llallës

Do të ishte Prokuroria e Durrësit, ajo që do të regjistronte procedimin e parë penal për ish-kryeprokurorin Llalla.

Në mars të 2018-ës, mbi të do të rëndonin katër akuza.

E para ishte ajo e pastrimit të produkteve të veprës penale, më pas e shpërdorimit të detyrës, mosdeklarimit të të ardhurave, si dhe mosdeklarimit të shumave të të hollave në kufi.

Më pas, u kalua për kompetencë tek ish-Krimet e Rënda dhe SPAK. Ai u akuzua nga SPAK-u për “fshehje dhe mosdeklarim të pasurisë”.

Ish-prokurori u gjykua për veprën penale të fshehjes sё pasurisё. Ndërkohë, ishte vendosur dhe njё hetim pёr pastrimin e parave.

Në dhjetor të vitit të kaluar, Gjykata e Posaçme vendosi për sekuestrimin e pesë pasurive të paluajtshme të ish-kryeprokurorit.

Ky vendim erdhi pas një kërkese të SPAK-ut.

Në përfundim të hetimit, SPAK vlerësoi se, ndaj tij, provohej vetëm akuza e “mosdeklarimit të pasurisë”.

Pasi përfundoi mandatin e kryeprokurorit, Llalla dha dorëheqjen nga sistemi dhe nuk iu nënshtrua vettingu-t.

Ndërsa Departamenti Amerikan i Shtetit e shpalli atë persona non grata, duke i ndaluar atij dhe familjes hyrjen në SHBA.

Apel pas Apeli

Më 20 maj 2021, Adriatik Llalla do të dënohej nga Gjykata e Posaçme me dy vjet burgim dhe pesë vjet përjashtim nga çdo post publik.

Ky vendim do të vinte pasi në shkurt 2021, Gjykata e Lartë pati vendosur të sekuestronte disa pasuri të ish-kryeprokurorit.

Por ai nuk do ta pranonte vendimin dhe do ta apelonte më 3 qershor 2021. Seanca e radhës, u caktua në korrik.

Megjithatë, në çështjen e 16 korrikut të vitit 2021, avokati mbrojtës i Llallës, Hazizaj, u bë shkak për shtyrjen e vendimit. Ai mungoi pa arsye, për çka u gjobit edhe me 20 mijë lekë.

Seanca u shty me dy javë, për më 30 korrik, po ajo sërish nuk u zhvillua. Shkak u bë sërish mungesa e ish-kryeprokurorit, por këtë herë, ai e arsyetoi mungesën me gjendjen shëndetësore jo të mirë.

Më 9 shtator, avokati Hazizaj paraqiti disa prova të reja në mbrojtje të klientit të tij. Këto prova gjithsesi, GJKKO-ja nuk i pranoi. Ndaj, për një vendim përfundimar, çështja u shty më 22 shtator.

Llalla sërish nuk ishte në seancë, me pretendimin se ishte në gjendje të keqe shëndetësore.

Pikërisht 22 shtatori do të ishte edhe vula e Apelit, i cili përtej mungesës së ish-kryeprokurorit, e la në fuqi dënimin ndaj tij, duke i hapur rrugë policisë për të zbatuar vendimin e arrestimit.

Një dënim që erdhi, por jo me arrestim, pasi Llalla nuk gjendej në banesë.