Një ngjarje e rëndë është shënuar mëngjesin e 31 Dhjetorit në Lushnje, rreth orës 09.00. Kryetarit të Bashkisë, Fatos Tushe, mbeti i plagosur si pasojë i shpërthimit të një granate që u hodh në zyrën e tij. E plagosur mbeti edhe sekretarja e kryetarit, Erisa Qalliu.

Kryebashkiaku dhe sekretarja janë transportuar me urgjencë në spital, mjekët thonë se ata janë jashtë rrezikut për jetën.

Aktualisht në vendin e ngjarjes ndodhet policia, e cila po heton për zbardhjen e shkaqeve të shpërthimit.

Si ndodhi ngjarja?

Pak kohë pasi kryetari i Bashkisë kishte mbërritur në zyrë, aty ka hyrë dhe ish-shoferi i tij Gëzim Saraçi i cili ka hedhur mjetin shpërthyes.

Mësohet se ish-shoferi e ka pritur  Kryetarin e Bashkisë, Fatos Tusha në shkallët selisë së bashkisë, ndërsa në zyrë kanë debatuar ashpër me njëri-tjetri.

Burime policore thanë se Saraçi është shpallur në kërkim. Policia ka ngritur postblloqe në të gjithë hyrjet dhe daljet e qytetit.

Gëzim Saraçi, nga Karbunara, ka qenë shofer i Tushës por që është pushuar nga puna në gjysmën e mandatit të tij të dytë. Kjo besohet se ka qenë edhe arsyeja e aktit të sotëm.

Për në Lushnjë janë nisur drejtori i përgjithshëm i policisë së Shtetit Ardi Veliu dhe Drejtori i Policisë Kriminale në Policinë e Shtetit, Tonin Vocaj.

Veritas.com.al/