Presidenti i Shteteve të Bashkuara, Donald Trump, ka vendosur tarifa të reja globale në nivelin 10%, pasi Supreme Court bllokoi të premten një pjesë të konsiderueshme të taksave të tij të gjera mbi importet.

Vetëm disa orë pas vendimit të javës së kaluar, presidenti nënshkroi një urdhër ekzekutiv për vendosjen e tarifës së re, e cila do të hyjë në fuqi më 24 shkurt.

Më vonë, Trump paralajmëroi se mund ta rrisë tarifën në 15%, por deri tani nuk ka nxjerrë një urdhër zyrtar për ndryshimin e normës. BBC-ja ka kontaktuar White House për një koment.

Administrata po e zbaton këtë masë në bazë të Nenit 122 të Aktit të Tregtisë të vitit 1974, i cili i lejon presidentit të vendosë tarifa për një periudhë deri në 150 ditë pa miratimin e Kongresit.

Sipas urdhrit ekzekutiv, tarifa e përkohshme e importit synon të “adresojë problemet themelore të pagesave ndërkombëtare dhe të vazhdojë punën e administratës për të ribalancuar marrëdhëniet tregtare në dobi të punëtorëve, fermerëve dhe prodhuesve amerikanë”.

Presidenti ka argumentuar se tarifat janë të domosdoshme për të ulur deficitin tregtar të SHBA-së — diferencën midis importeve dhe eksporteve. Megjithatë, javën e kaluar deficiti arriti një nivel të ri rekord, duke u zgjeruar me 2.1% krahasuar me vitin 2024 dhe duke arritur në rreth 1.2 trilionë dollarë (890 miliardë paund).

Sipas të dhënave më të fundit zyrtare, SHBA-ja ka mbledhur të paktën 130 miliardë dollarë nga tarifat e vendosura në bazë të Aktit për Fuqitë Ekonomike në Emergjencë Ndërkombëtare të vitit 1977 (IEEPA).

Trump ka reaguar ashpër ndaj vendimit të Gjykatës Supreme, duke e cilësuar atë si “qesharak, të shkruar dobët dhe jashtëzakonisht anti-amerikan”.

Në një vendim me raport votash 6-3, gjyqtarët e Gjykatës Supreme konstatuan se presidenti kishte tejkaluar kompetencat e tij kur vendosi tarifat e gjera globale vitin e kaluar duke përdorur IEEPA-n.

Të hënën, Trump paralajmëroi vendosjen e tarifave më të larta ndaj vendeve që “luajnë lojëra” me marrëveshjet e fundit tregtare, pas vendimit të Gjykatës Supreme.

Deklarata e tij erdhi në një kohë kur vende të ndryshme në mbarë botën po vlerësojnë ndikimin e vendimit dhe po shqyrtojnë se cilat tarifa dhe marrëveshje tregtare do të mbeten në fuqi.

Mbretëria e Bashkuar deklaroi se asnjë masë reciproke “nuk është përjashtuar”, nëse SHBA-ja nuk respekton marrëveshjen tarifore me Londrën, por shtoi se “askush nuk dëshiron një luftë tregtare”.

Ndërkohë, Bashkimi Evropian bëri të ditur se do të pezullojë ratifikimin e një marrëveshjeje të arritur gjatë verës, ndërsa India njoftoi se do të shtyjë bisedimet e planifikuara më herët për finalizimin e një marrëveshjeje të fundit.